Bıyl 13 shaqyrym jol jóndelip, 2 myń shaqyrym jol salynady

ASTANA. KAZINFORM – Kólik mınıstri Marat Qarabaev Úkimet otyrysynda bıyl júzege asatyn jol salý jáne jóndeý jobalaryn atady.

- Bıyl 13 myń shaqyrymdy jol jóndeý jumystarymen qamtý josparlanǵan. Onyń ishinde 9 myń 500 shaqyrymy qarjy kózderimen qamtamasyz etilgen, 3 myń 600 shaqyrymyna qajetti qujattar daıyn, qarjylandyrý máselesi pysyqtalýda. Qurylys maýsymy bastalǵanǵa deıin jańa jobalardyń merdigerlerin anyqtaý úshin konkýrstyq rásimder júrgizilip jatyr. 2025 jyldyń qorytyndysyna sáıkes respýblıkalyq joldardyń 94, jergilikti joldardyń 91 paıyzy normatıvtik jaǵdaıǵa jetkiziledi, - dedi Marat Qarabaev.

Sondaı-aq, bıyl Qalbataý – Maıqapshaǵaı (405 km), Qurty – Qonaev (67 km), Qyzylorda – Jezqazǵan (398 km) jáne Uzynaǵash – Otar (42 km) joldarynda qurylys jumystary jalǵaspaq. Al «Aqtóbe – Ulǵaısyn» (234 km), «Qaraǵandy – Jezqazǵan» (572 km), «Atyraý – Dossor» (86 km), «Saryaǵash qalasynyń aınalma joly» (102 km) birinshi tehnıkalyq sanatqa aýystyrylady.

Mınıstr jol salý jáne jóndeý jobalarynyń merdigerlerin irikteýde qazaqstandyq nemese Qazaqstannyń sheteldik kompanııalarmen birlesken konsortsıýmdaryna basymdyq beriletinin aıtty.

- Bul otandyq kompanııalardyń odan ári turaqty damýyna yqpalyn tıgizedi. Bul máselede halyqaralyq qarjy ınstıtýttarynyń tolyq kelisimi bar, - dedi vedomstvo basshysy.

Buǵan deıin bıyl eldegi avtojoldardyń aqyly ýchaskelerindegi tarıfter orta eseppen 30 paıyzǵa ósýi josparlanǵany málim bolǵan edi.