Bıyl 13 myń shaqyrym jol jóndelip, jańa jobalar iske asyp jatyr - Úkimet

ASTANA. KAZINFORM – Bıyl elimizde 13 myń shaqyrym avtojol qurylys-jóndeý jumystarymen qamtyldy. Bul týraly Premer-Mınıstr Oljas Bektenov AMANAT partııasy fraktsııasynyń keńeıtilgen otyrysynda aıtty, dep habarlaıdy agenttik tilshisi.

«Negizgi baǵyttardyń ishinde «Qalbataý–Maıqapshaǵaı», «Qyzylorda–Jezqazǵan», «Uzynaǵash–Otar» jáne basqa da birqatar strategııalyq mańyzdy baǵyttar bar. Sonymen qatar jalpy uzyndyǵy 1,9 myń shaqyrym bolatyn jańa jobalardy iske asyrý jumystary júrgizilýde. Olardyń ishinde «Ortalyq–Batys», «Aqtóbe–Ulǵaısyn», «Qaraǵandy–Jezqazǵan», «Atyraý–Dossor» jobalary, sondaı-aq Saryaǵash, Qyzylorda, Rýdnyı jáne Petropavl qalalarynyń aınalma joldary bar», – dedi Úkimet basshysy.

Premer-Mınıstrdiń aıtýynsha, temir jol salasynda da aýqymdy jobalar júzege asyrylyp jatyr. «Dostyq–Moıynty» ýchaskesinde ekinshi joldardyń qurylysy aıaqtaldy. Jyl sońyna deıin iske qosylatyn bul joba baǵyttyń ótkizý qabiletin 5 ese, konteınerlik poıyzdardyń jyldamdyǵyn 2 ese arttyrady.

Almatynyń aınalma jolynda ústińgi qabat tóselýde, jumystar bıyl jyl sońyna deıin aıaqtalmaq. «Darbaza–Maqtaaral» jelisiniń qurylysy shtattyq rejımde júrgizilýde jáne 2026 jyldyń jeltoqsanynda aıaqtalady.

Sonymen qatar Transkaspıı halyqaralyq kólik baǵyty boıynsha teńiz ınfraqurylymyn damytý belsendi júrip jatyr. Aqtaý portynda teńiz túbin tereńdetý jumystary bastaldy. Quryq portynda «Sarja» kópfýnktsıonaldy termınalynyń qurylysy aıasynda negizgi (qurǵaq) júk, astyq, munaı jáne ámbebap termınaldar salynýda.

Oljas Bektenov avıatsııa salasynda da birqatar jumystar júrgizilgenin atap ótti. Ótken jyly elimizdiń 10 áýejaıynda qurylys jáne jóndeý jumystary aıaqtaldy. Jeke ınvestıtsııalar esebinen Almaty, Shymkent jáne Qyzylordada jańa jolaýshylar termınaldary salyndy. Bul olardyń ótkizý qabiletin 6,5 esege arttyrdy.

Qazirgi ýaqytta Memleket basshysynyń tapsyrmasyna sáıkes Zaısan, Kendirli jáne Qatonqaraǵaı kýrorttyq aımaqtarynda úsh jańa áýejaıdyń qurylysy bastaldy. Sonymen qatar Arqalyq qalasyndaǵy áýejaı qalpyna keltirilýde.

Aıta keteıik, Qazaqstandaǵy eń uzyn kósheni jóndeý jumystary aıaqtalýǵa jaqyn.