Bıyl 111 myńǵa jýyq bala kómek surap 111 baılanys ortalyǵyna júgingen
ASTANA. KAZINFORM – Jyldyń basynan beri otbasy, áıelder men balalardyń quqyqtaryn qorǵaý máseleleri boıynsha ótinishter qabyldaıtyn «111» biryńǵaı baılanys ortalyǵyna balalardan 110 999 ótinish tústi, dep habarlaıdy Oqý-aǵartý mınıstrliginiń Balalardyń quqyqtaryn qorǵaý komıteti.
Ótinishterdiń 108 987-si mektepter men kolledjderge ornalastyrylǵan QR-kodtar arqyly, al 2 012-si telefon qońyraýy arqyly qabyldanǵan.
Baılanys ortalyǵynyń jumysy barysynda 3 499 balaǵa psıhologııalyq kómek kórsetildi, sondaı-aq 1 602 ótinish boıynsha tıisti memlekettik organdarmen birlesip jedel qoldaý uıymdastyryldy. Ótinishterdiń basym bóligi aqparattyq jáne keńes berý sıpatynda boldy.
Eń kóp ótinish túsken óńirler qatarynda Almaty qalasy (9 160), Batys Qazaqstan (7 654) jáne Túrkistan oblysy (7 478) bar. Al eń az kórsetkishter Ulytaý (1 017), Soltústik Qazaqstan (1 738) jáne Abaı oblystarynda (1 765) tirkelgen.
Memlekettik organdardyń qatysýyn qajet etken ótinishter ortalyq jáne jergilikti atqarýshy organdarmen, sondaı-aq QR Bala quqyqtary jónindegi ýákili, óńirlik ýákilder jáne úkimettik emes uıymdarmen birlesip qaraldy.
— Ótinishterdi taldaý barysynda balalardyń qońyraý shalýdan góri jazyp kómek suraýdy jıi tańdaıtyny anyqtaldy. Kópshiligi sóılesýge uıalady, keıbiri qobaljıdy. Al habarlama arqyly óz oıyn ashyq aıtyp, anonımdi túrde kómek alýǵa múmkindik bar. Kún saıyn mamandar júzdegen balanyń janaıqaıyn estıdi. Biri ýaıymyn, biri qorqynyshyn, endi biri otbasyndaǵy nemese dostar arasyndaǵy túsinispeýshilikterin bólisedi. Jaqynda bir oqýshy QR-kod arqyly habarlama jazyp, kómek suraǵan. Mamandar oǵan júıeli psıhologııalyq qoldaý kórsetip, ózine degen senimdiligin qalpyna keltirýge kómektesti. Ár bala mektepte ózin túsinetin jáne qoldaıtyn ustazy bar ekenin sezinýi kerek, — dedi QR Oqý-aǵartý mınıstrligi Balalardyń quqyqtaryn qorǵaý komıtetiniń tóraǵasy Nasymjan Ospanova.
Onyń aıtýynsha, árbir ata-ana men muǵalim balasyna qysqa ǵana «111» nómirin este saqtap, qajet bolǵan jaǵdaıda qaıda júginý keregin úıretýi mańyzdy.
Eske salaıyq, 2024 jyldyń shildesinde Memleket basshysynyń tapsyrmasymen qabyldanǵan «Áıelderdiń quqyqtary men balalardyń qaýipsizdigin qamtamasyz etý máseleleri jónindegi» zań aıasynda «111» baılanys ortalyǵynyń fýnktsııalary balanyń quqyqtaryn qorǵaý salasyndaǵy ulttyq tetik retinde zańnamalyq deńgeıde bekitilgen.
Aıta keteıik, Abaı oblysynda ishimdik ishken 28 balanyń ata-anasy jaýapqa tartyldy.