Bıyl 11 myń shaqyrymnan astam avtojol jobalarmen qamtylady
ASTANA. KAZINFORM — Kólik vıtse-mınıstri Maqsat Qalıaqparovtyń tóraǵalyǵymen Avtomobıl joldary komıtetiniń, vedomstvolyq baǵynysty uıymdar men olardyń fılıaldarynyń basshylyǵy, sondaı-aq oblystar men respýblıkalyq mańyzy bar qalalardyń salaǵa jetekshilik etetin basqarmalardyń basshylary qatysqan keńeıtilgen keńes ótti. Bul týraly vedomstvonyń baspasóz qyzmeti málim etti.
Jıynda ótken jol-qurylys maýsymynyń qorytyndylary shyǵarylyp, aldaǵy kezeńge arnalǵan salanyń damý basymdyqtary aıqyndaldy.
Ótken jol-qurylys maýsymyn qorytyndylaı kele, atqarylǵan jumystardyń aýqymdy kólemi atap ótildi. Atap aıtqanda, 2025 jyly barlyq jumys túrlerimen shamamen 13 myń shaqyrym jol qamtyldy. Onyń ishinde 6 myń shaqyrym jolda jumystar tolyq aıaqtaldy: 3 myń shaqyrymy — respýblıkalyq jelide, 3 myń shaqyrymy — jergilikti jelide.
— Jyl qorytyndysy boıynsha normatıvtik jaǵdaıdaǵy joldardyń úlesi respýblıkalyq jelide 94%-ǵa, jergilikti jelide 91%-ǵa deıin jetkizildi. Avtomobıl joldarynda 10 myńnan astam tehnıka birligi jáne shamamen 25 myń óndiristik personal jumyldyryldy. 10 mln tonnadan astam asfaltbeton qospasy tóselip, 1 218 myń tonna jol bıtýmy paıdalanyldy, — delingen vedomstvonyń habarlamasynda.
Keńes barysynda aǵymdaǵy jylǵa arnalǵan josparlar talqylandy. Bıyl respýblıkalyq jáne jergilikti mańyzy bar avtomobıl joldarynyń 11 myń shaqyrymnan astamy jobalarmen qamtylmaq. Bul jańa qurylys jumystaryn da, sondaı-aq qoldanystaǵy jol jelisin rekonstrýktsııalaý, kúrdeli jáne ortasha jóndeý jumystaryn da qamtıdy. Atap aıtqanda, Memleket basshysynyń bastamasymen qolǵa alynǵan strategııalyq ınfraqurylymdyq baǵyttardy belsendi iske asyrý bastalady. Olardyń qatarynda «Ortalyq — Batys», «Qaraǵandy — Jezqazǵan», «Saryaǵash qalasyn aınalyp ótý joly» jáne óńirlerdiń kólik baılanysyn nyǵaıtý men eldiń tranzıttik áleýetin damytýǵa yqpal etetin mańyzdy jobalar bar.
Keńeste salany tsıfrlyq transformatsııalaý máselesine de erekshe nazar aýdaryldy. Elde respýblıkalyq jáne jergilikti mańyzy bar joldar jónindegi derekterdi biryńǵaı tsıfrlyq platformaǵa biriktiretin «E-Joldar» biryńǵaı aqparattyq júıesi qurylýda. Qazirgi ýaqytta «Jol pasporty», «Jol jóndeý» jáne «Qoǵamdyq baqylaý» modýlderi ázirlendi, jol jelisi boıynsha tolyq ári ózekti aqparatpen «Jol pasporty» modýlin toltyrý jumystary qarqyndy júrgizilýde. 2026 jyldyń ekinshi jartysynda «Taldaý», «Júrgizýshilerge arnalǵan ınfroortalyq» jáne «Jaǵdaılyq ortalyq» modýlderin ázirleý aıaqtalǵannan keıin júıeni pılottyq paıdalanýǵa engizý josparlanyp otyr.
— Tsıfrlandyrý úderisterdiń ashyqtyǵyn qamtamasyz etip, joldardyń jaı-kúıin jedel monıtorıngteýge, atqarylǵan jumystardyń sapasyn baqylaýǵa jáne eldiń avtojol ınfraqurylymyn tıimdi basqarýǵa múmkindik beredi dep kútilýde. Sonymen qatar keńes barysynda Astana aglomeratsııasyn damytý, jergilikti jol jelisin jańǵyrtý, salalyq ǵylymdy ilgeriletý jáne kadr daıarlaý máseleleri de jeke qaraldy, — dep habarlady vedomstvodan.
Kezdesý qorytyndysynda Maqsat Qalıaqparov basym baǵyttar retinde sapany qamtamasyz etý, merzimderdi saqtaý, zamanaýı tehnologııalardy engizý jáne barlyq josparlanǵan jobalardy múltiksiz iske asyrý mańyzdy ekenin atap ótti.
Eske sala keteıik, Májilis depýtaty Jol qoryn qurýdy usyndy.
