Bıyl 105 gıdrotehnıkalyq qurylysqa tekserý júrgiziledi

ASTANA. KAZINFORM – Soltústik Aral sý qoımasynyń kólemi 24,4 mlrd tekshe metrge deıin ulǵaıdy. Bul týraly Úkimet úıinde ótip jatqan baspasóz máslıhatynda Premer-mınıstrdiń orynbasary Qanat Bozymbaev aıtty.

- 2025 jyly 9 sáýirde Sý kodeksi qabyldanyp, 10 maýsymda kúshine endi. Qazirgi tańda 6 myńnan astam shaqyrym kanal jańǵyrtylyp jatyr. Onyń ishinde osy jyly shamamen 200 myń gektar alqap sý alatyn 962 shaqyrym kanal paıdalanýǵa berilmek. 2025 jyly Jetisý oblysyndaǵy Qyzylaǵash sý qoımasynyń qaıta jańǵyrtylýy aıaqtaldy. Sondaı-aq jyl sońyna deıin Túrkistan oblysyndaǵy «Qaraqýys» sý qoımasy, Batys Qazaqstan oblysyndaǵy Kırov sý qoımasy qurylysy jáne basqa nysandar boıynsha jumys aıaqtalady. 105 gıdrotehnıkalyq qurylysqa kópfaktorly tekserý júrgizý josparlanyp otyr, - dedi ol.

Vıtse-premerdiń aıtýynsha, jyl sońyna deıin 6 oblysta toptyq sý qubyryn salý jáne qaıta qurý boıynsha 10 jobany paıdalanýǵa berý josparlanǵan.

- Bıylǵy kóktemgi kezeńiniń nátıjesinde Qazaqstan sý qoımalaryna 16,9 mlrd tekshe metr sý keldi. 15,7 mlrd tekshe metr erigen qar sýy kól júıeleri men lımandarǵa taratyldy. Balqash kóline Qapshaǵaı sý qoımasynan 3,8 mlrd tekshe metr sý jiberildi. 2024-2025 jyldary Soltústik Aralǵa shamamen 5 mlrd tekshemetr sý berilip, qoımanyń kólemi 24,4 mlrd tekshe metrge deıin ulǵaıdy, - dedi Qanat Bozymbaev.

Osyǵan deıin Qanat Bozymbaev Qyrǵyzstan men Ózbekstanda sý jetkizý máseleleri boıynsha kelissózder júrgizgen bolatyn.