Bıyl 103 sýarý kanalyn avtomattandyrý bastalady
ASTANA. KAZINFORM – 2026 jyldyń sońyna deıin sý tutynýdy boljaý júıesi iske qosylady. Bul týraly búgin Úkimet otyrysynda Premer-mınıstrdiń orynbasary – Jasandy ıntellekt jáne tsıfrlyq damý mınıstri Jaslan Madıev aıtty.
– Perspektıvalyq jobalardyń taǵy biri ol – elektrondyq sharttar jasasý jáne sý tutynýdy boljaý júıesi. Qazirgi tańda bul júıe pılottyq rejımde jumys isteıdi, al ónerkásiptik paıdalanýǵa berý osy jyldyń sońyna deıin dep josparlanýda. Azamattarǵa paıdalaný yńǵaıly bolý úshin Egov mobile, ekinshi deńgeıli jáne 1S banktermen ıntegratsııalaýdy josparlap otyrmyz, - dedi vıtse-premer.
Onyń aıtýynsha, bıyl 103 sýarý kanalyn avtomattandyrý bastalady.
– Ońtústik óńirlerde – Qyzylorda, Jambyl jáne Túrkistan oblystarynda – bekitpelerdi basqarý kózdelgen. Islam damý bankiniń qoldaýymen taǵy 264 kanaldy tsıfrlandyrý josparlanýda. Sýdy josparlaý jáne basqarýǵa arnalǵan baǵdarlamalyq qamtylym qarastyrylyp otyr. Qashyqtan basqarý pýlti aralap tekserýdi almastyrady jáne 24/7 sýdyń taralýyn avtomatty baqylaýdy qamtamasyz etedi, - dedi Jaslan Madıev.
Buǵan deıin elimizdegi 90 qala men 7,5 mıllıon turǵyny bar 6 087 aýyl aýyz sýmen 100 paıyz tolyq qamtamasyz etilgenin jazǵan edik.