Bıyl 10 aıda memlekettik bıýdjetke 15,5 trln teńge kiris tústi
Bıyl 10 aıda memlekettik bıýdjetke 15,5 trln teńge kiris tústi. Bul týraly Úkimet otyrysynda Qarjy vıtse-mınıstri Dáýren Temirbekov aıtty, dep habarlaıdy Kazinform.
«Memlekettik bıýdjetke túsken kiristerdiń somasy 15,5 trln teńgeni qurady nemese jospar 98,3 paıyzǵa oryndaldy. Respýblıkalyq bıýdjetke 10,5 trln teńgege jýyq qarajat tústi. Jospar 92,8 paıyzǵa, onyń ishinde salyqtar boıynsha 87,3 paıyzǵa atqaryldy. Salyqtar boıynsha jospardyń oryndalmaýy negizinen korporatıvtik tabys salyǵy, ımportqa salynatyn qosylǵan qun salyǵy, shıki munaıǵa eksporttyq keden bajy jáne paıdaly qazbalardy óndirýge salynatyn salyq esebinen qalyptasty», - dedi vıtse-mınıstr.
Onyń atap ótýinshe, korporatıvtik tabys salyǵy boıynsha jospardyń oryndalmaýy 294 iri salyq tóleýshi boıynsha málimdelgen avanstyq tólemder somasynyń 23%-ke azaıýymen baılanysty boldy. Importqa salynatyn qosylǵan qun salyǵy boıynsha jospardyń oryndalmaýy taýarlardyń jekelegen toptary boıynsha ımport kóleminiń tómendeýi, Eýrazııalyq ekonomıkalyq odaq elderinen ımport kóleminiń 8 paıyzǵa azaıýy esebinen oryn aldy.
«Shıki munaıǵa eksporttyq keden bajy boıynsha jospardyń negizgi oryndalmaýy eksporttyq keden bajynyń naqty qalyptasqan mólsherlemesiniń boljamdy kórsetkishten 9 paıyzǵa tómendeýimen baılanysty boldy. Paıdaly qazbalardy óndirýge salynatyn salyq boıynsha jospardyń oryndalmaýyna negizgi eksporttyq taýarlar baǵasynyń ortasha eseppen 12 paıyz tómendeýi áser etti. Salyqtyq emes túsimder boıynsha asyra oryndaý aktsııalardyń memlekettik paketine dıvıdendter esebinen qalyptasty», - dedi ol.
Vıtse-mınıstr jergilikti bıýdjetterdiń kiristeri 111,7 paıyzǵa atqarylǵan jáne 5,1 trln teńgeni quraǵanyn atap ótti.
«Jospar 534 mlrd teńgege, onyń ishinde salyqtar boıynsha 474 mlrd teńgege asyra oryndaldy. Almaty oblysynan basqa barlyq óńirlerde kirister boıynsha josparlar asyra oryndalyp otyr», - dedi Dáýren Temirbekov.
