Bıyl 1-synypqa 380 myńnan astam bala qabyldanady
ASTANA. KAZINFORM — Bıyl 1-synypqa tapsyrylǵan qujattardyń 89 paıyzǵa jýyǵy elektrondy formatty berildi. Bul týraly Úkimet otyrysynda Oqý-aǵartý mınıstri Juldyz Súleımenova aıtty.
— Bıyl alǵash ret QazTech platformasynda Biryńǵaı «OQU» platformasy aıasynda «1-synypqa qabyldaý» kezeń-kezeńimen iske qosyldy. 1-synypqa qujattardy qabyldaý Oqý-aǵartý mınıstrligi men Jasandy ıntellekt jáne tsıfrlyq damý mınıstrliginiń birlesken buıryǵy negizinde pılottyq joba aıasynda júzege asyrylady. Jekeleı atap ótetin jaıt, ótinishterdiń 88,7 paıyzdan astamy elektrondyq formatta qabyldandy. Bul ata-analarǵa bilim berý uıymdaryna jeke barmaı-aq, barlyq qajetti rásimderdi onlaın rejımde júzege asyryp, ýaqytty únemdeýge múmkindik beretin memlekettik kórsetiletin qyzmetterdiń qoljetimdiligi men yńǵaılylyǵyn ańǵartady, — dedi mınıstr.
Onyń málimetinshe, 1-synypqa balalardy qabyldaý bekitilgen kestege sáıkes 2026 jylǵy 27 mamyrdan 31 tamyzǵa deıin kezeń-kezeńimen júrgiziledi. Bıyl 1-synypqa 380 myńnan astam bala qabyldanady dep kútilýde. Bul rette ata-analardyń ótinish berý belsendiligi joǵary deńgeıde saqtalyp otyr. Sonymen birge bilim berý uıymdaryna erekshe bilim berý qajettilikteri bar 4 202 bala qabyldandy.
— Jalpy, balalardy birinshi synypqa qabyldaý jumystary josparly túrde júrgizilip jatyr. Damyǵan tsıfrlyq ınfraqurylymnyń jáne jergilikti jerlerde jumysty tıimdi uıymdastyrýdyń arqasynda jergilikti atqarýshy organdar otbasylardyń qajettilikterine ýaqtyly den qoıyp, árbir balany mektepke qabyldaýdy qamtamasyz etedi, — dedi Juldyz Súleımenova.
Aıta keteıik, Úkimet otyrysynda Mınıstrler kabınetiniń músheleri jańa oqý jylyna daıyndyq barysyn talqyǵa salyp jatyr.
