Bıyl 1 676 adam koronavırýspen aýyrdy – Bas sanıtar dáriger
ASTANA. KAZINFORM – Bıyl elimizde 1 676 adam koronavırýspen aýyrdy. Bul týraly DSM Sanıtarlyq-epıdemıologııalyq baqylaý komıtetiniń tóraǵasy – Bas memlekettik sanıtarlyq dáriger Sarhat Beısenova aıtty.
Ortalyq referendým komıssııasy otyrysyndaǵy dereginshe, koronavırýsqa shaldyqqandardyń arasynda ólim-jitim tirkelgen joq. Sonymen qatar ótken jylmen salystyrǵanda naýqastaný deńgeıi 7 esege tómendedi. Al qyrkúıek aıynda elimiz boıynsha 252 jaǵdaı tirkeldi. Bul 2023 jyldyń qyrkúıegindegi málimetten 2 ese az.
«JRVI men tumaýǵa keler bolsa, jyl saıyn elimizde, epıdemologııalyq maýsym kezinde 3-4 mln jiti respıratorlyq vırýstyq ınfektsııa jáne 2 myńǵa deıin tumaý tirkeledi. Osy jyldyń qyrkúıeginde elde 544 myń JRVI tirkeldi. Bul ótken jylydń qyrkúıegimen salystyrǵanda 27 paıyzǵa tómen. Tumaý jaǵdaılary tirkelgen joq», - dedi ol.
Bas sanıtarlyq dárigerdiń aıtýynsha, tumaýǵa qarsy vaktsına satyp alyndy jáne halyqtyń ekpe alynýy tıisti sanatyna ekpe jasalyp jatyr. Sondaı-aq ol Ortalyq referendým komıssııasyna referendým ótkizý kezinde daýys berýshilerdiń legin retteýge keńes berdi.
