Bıiktigi 1 metr tsýnamı «Fýkýsıma-1» AES-ke jetti
ASTANA. QazAqparat - Qýaty 7,4 baldyq joıqyn jer silkinisinen keıin bıiktigi 1 metr bolatyn tsýnamı tolqyny Japonııanyń apatqa ushyraǵan "Fýkýsıma-1" atom elektr stansysyna deıin jetti, dep habarlady QazAqparat TASS agenttigine silteme jasap.
Agenttiktiń Tokyo Electric Power operator-kompanııasyna silteme jasap jazýynsha, dál osyndaı tolqyn kórshiles "Fýkýsıma-2" stansysyna da jetken. Onda shtattan tys jaǵdaıdyń týyndaǵany jóninde aqparat túsken joq.
Eske salaıyq, búgin jergilikti ýaqytpen 05:59-da (máskeý ýaqytymen saǵat 23:59) Fýkýsıma prefektýrasynyń soltústik-batysynda 7,4 baldyq jer silkinisi boldy. Zilzaladan keıin tsýnamı týyndap, onyń ekpini Fýkýsıma prefektýrasyna qaýip tóndirýi múmkindigi týraly habarlanǵan bolatyn.
Japonııa Ulttyq meteorologııalyq basqarmasynyń málimdeýinshe, apat kindigi prefektýranyń shyǵysyna qaraı ornalasqan, al oshaǵy muhıt túbinde 25 shaqyrym tereńdikte boldy.
Tsýnamı qaýpi áli de saqtalýda, tolqyn bıiktigi 3 metrge jetýi yqtımal.
Jer silkinisinen keıin "Fýkýsıma-2" AES-tiń úshinshi reaktorynda qoldanylǵan ıadrolyq otyn basseınin salqyndatý júıesiniń toqtaýy oryn aldy. Bir saǵattan soń onyń jumysy qalpyna keltirildi jáne radıatsııanyń aǵýy anyqtalǵan joq.
