Bıgeldi Ǵabdýllın kinásin tolyqtaı moıyndady
ASTANA. QazAqparat - Bıýdjettik qarjyny alý úshin bopsalaý áreketine bardy dep aıyptalǵan CentralAsiaMonitor-dyń bas redaktory ári Radiotochka.kz dırektory Bıgeldi Ǵabdýllın óz kinásin tolyqtaı moıyndady, dep habarlaıdy QazAqparat tilshisi sot zalynan.
«QR Qylmystyq kodeksiniń 1 baby, 1 tarmaqshasyna sáıkes, birinshi ret kishigirim nemese ortasha aýyr qylmys jasaǵan adam, eger ol qylmys jasaǵannan keıin aıybyn moıyndap, óz erkimen kelse nemese qylmysty ashýǵa járdemdesse nemese qylmystyq jolmen jasalǵan zııandy ózgeshe túrde qalpyna keltirse, qylmystyq jaýaptylyqtan bosatylýy múmkin. Sotqa deıingi tergeý barysynda Ǵabdýllın óziniń qylmys jasaǵandyǵyn moıyndady. Jasaǵan isine ókinip, qylmysty ashýǵa belsendi kómek kórsetti. Zardap shegýshilerge 20 mln. 625 myń teńge kóleminde keltirgen shyǵynyn tolyqtaı ótedi», - dedi Ǵabdýlınniń advokaty Amanjol Muhamedııarov.
Sonymen qatar ol Bıgeldi Ǵabdýllınniń tergeý protsessi barysynda qylmysty moıyndaǵany jáne tergeýge kómek kórsetkeni úshin qylmystyq qýdalaýdan bosatý týraly ótinish jasaǵandyǵyn aıtty.
«Zardap shegýshilerge keltirilgen zalal tolyq kólemde qaıtaryldy jáne olar Ǵabdýllındi qylmystyq qýdalaýdan bosatýǵa qarsy emes», - dedi Muhamedııarov.
Al prokýror bolsa, Ǵabdýllındi qylmystyq qýdalaýdan bosatýǵa narazylyq tanytty.
Osydan keıin sot sheshim qabyldaý úshin keńesý bólmesine ótti. Іs Astana ýaqyty boıynsha saǵat 17-00-de qaıta jalǵasady.
Esterińizge sala keteıik, ótken jyldyń 16 qarashasynda Astana qalasy Almaty aýdandyq №2 sotynyń sanktsııasymen Bıgeldi Ǵabdýllın tutqynǵa alynǵan bolatyn. Ǵabdýllın «Central Asia Monitor» jáne «Radiotochka.kz» buqaralyq aqparat quraldarynyń paıdasyna bıýdjettik qarjyny alý úshin bopsalaý áreketine bardy dep aıyptalǵan bolatyn. Ol óz quzyryndaǵy buqaralyq aqparat quraldaryn paıdalanyp, memlekettik organ jetekshileriniń iskerlik abyroıyna nuqsan keletin materıaldardy jarııalaý arqyly olarǵa aqparattyq shabýyl jasaǵan. Aldaǵy ýaqytta synaýdy toqtatý úshin Ǵabdýllın laýazymdy tulǵalardan óz medıa resýrstaryna memlekettik tapsyrystar talap etken. Olar óz kezeginde Ǵabdýllınniń kompanııasyn qolpashtap, memlekettik satyp alýlar týraly kelisimsharttar bekitýdi qamtamasyz etken. Osydan keıin ǵana olardyń qyzmeti týraly tek jaǵymdy materıaldar jarııalanyp otyrǵan. Máselen, Jambyl oblysy ákimdiginen Ǵabdýllın 10 mıllıon teńge kólemindegi qarajat bopsalaǵan. Dál osy shemamen 7 memlekettik organ Ǵabdýllınge memlekettik tapsyrys alyp bergen.
