Big Shanhaıdaǵy órt: bazardaǵy órt qaýipsizdigi jeke aýdıt arqyly ǵana tekserilgen

ASTANA. KAZINFORM — Elordada 18 shildede «Big Shanhaı» bazarynda bolǵan órttiń sebebine qatysty tekserý júrip jatyr. Bul týraly QR Tótenshe jaǵdaılar vıtse-mınıstri Kegen Tursynbaev málim etti.

— Qazir tekserý júrip jatyr. Órt týraly aqparat bolmaǵan. Atap aıtqanda, № 7 órt sóndirý beketi «Big Shanhaıdyń» janynda ornalasqan, qutqarýshylar birinshi jáne tórtinshi qabattaǵy órtti baıqap qalǵan. Oqıǵa ornyna tótenshe jaǵdaılar qyzmetkerleri jetkende, barlyq esikter men qaqpalar jabyq turǵan. Órt sóndirýshiler qaqpany ózderi ashqan. Bizdiń qyzmetkerler órtti oqshaýlaýǵa bar kúshin saldy. Qazir qylmystyq is qozǵaý máselesi qaralyp jatyr. Órt qaýipsizdigi júıesindegi kemshilikter anyqtalyp, onyń barlyǵy tergeý aıasynda eskeriletin bolady, — dedi dedi K. Tursynbaev Ortalyq kommýnıkatsııalar qyzmetindegi baspasóz máslıhatynda.

QR TJM Órtke qarsy qyzmet komıteti basqarmasynyń basshysy Aıgerim Raıymqulovanyń aıtýynsha, atalǵan nysanda osyǵan deıin jeke aýdıt júrgizilgendikten, memlekettik baqylaý jasalmaǵan.

— Bul aýdıt 2019 jyldan 2024 jylǵa deıin júrgizildi. Onyń nátıjesinde eshqandaı kemshilik anyqtalmaǵany aıtylǵan. Bul turǵyda bizge tıisti qorytyndylar usynylǵan edi. Osyny eskere otyryp, memlekettik baqylaý bolmady… Qazir atalǵan órtke qatysty tıisti saraptamalar jasalyp jatyr, — dedi A. Raıymqulova.

Aıta keteıik, buǵan deıin 18 shildede «Big Shanhaı» bazarynyń órtengeni týraly habar TJD-ǵa kesh berilgeni málim boldy. 

Tilsiz jaýmen kúres barysynda úsh qutqarýshy jaraqat aldy.