«Bıg Shanhaı» bazaryndaǵy órttiń shyǵý sebebi anyqtaldy ma — TJM jaýaby
ASTANA. KAZINFORM — Jazda túgel otqa oranǵan elordadaǵy «Bıg Shanhaı» bazary biraz saýdagerdi shyǵynǵa batyryp, kásibine zalal keltirdi. Órt sebebi anyqtalatyny aıtylǵan. Tótenshe jaǵdaılar mınıstrliginen istiń qaı deńgeıde júrip jatqanyn surap kórgen edik.
Bazardaǵy órt faktisi boıynsha Astana qalasy Tótenshe jaǵdaılar departamenti sotqa deıingi tergeýdi bastaǵan edi. Tótenshe jaǵdaılar mınıstrliginiń agenttik saýalyna joldaǵan jaýabyna sáıkes, qazir órt oshaǵyn, onyń taralýyn jáne kináli tulǵalardy anyqtaýǵa baǵyttalǵan barlyq qajetti tergeý áreketi áli de júrgizilip jatyr. Vedomstvo Qylmystyq-protsestik kodeksiniń 201-babyna sáıkes, sotqa deıingi tergeý derekteri jarııa etýge jatpaıtyndyǵyn alǵa tartady.
Mınıstrlikten osy bazarda órt qaýipsizdigi boıynsha tekseris sońǵy ret qashan júrgizilgenin de suraǵan edik.
— «Azamattyq qorǵaý týraly» Zańnyń 38-baby 6-tarmaǵyna sáıkes baqylaý jáne qadaǵalaý sýbektisi saraptama uıymynyń oń qorytyndysyn alǵan kezde osy obekt, Kásipkerlik kodeksine sáıkes jospardan tys tekserýlerdi qospaǵanda, qorytyndy qoldanylatyn kezeńge baqylaý jáne qadaǵalaý sýbektisine (obektisine) barý arqyly profılaktıkalyq baqylaýdan bosatylady. Osylaısha, «Bıg Shanhaı» bazarynda órt qaýipsizdigi salasyndaǵy aýdıttiń oń qorytyndylarynyń bolýyna baılanysty tekseris júrgizilmedi, — delingen resmı jaýapta.
Sondaı-aq habarlamada órt sóndirýshilerdiń tilsiz jaýmen uzaq kúresý sebebi túsindirilgen.
— Órt sóndirýge habardyń kesh túsýi, qutqarýshylardyń alǵashqy legi jetken kezde órttiń órshýi, janǵysh zattardyń kóp bolýy, qurylys bólshekteriniń qulaý qaýpi kedergi keltirdi. Sondaı-aq «Orda bazary» arqyly jalǵaıtyn galereıalarmen kórshi ǵımaratqa jalynnyń ótý qaýpi isti qıyndatty, — deıdi vedomstvo.
Aıta ketsek, osy órtti sóndirý kezinde zardap shekken Tótenshe jaǵdaılar departamentiniń qyzmetkerleri medıtsınalyq tıisti em alyp, búginde qyzmetin jalǵastyryp jatyr.
Mınıstrlik el aýmaǵyndaǵy saýda obektilerinde órttiń jıilep ketýine baılanysty, sondaı-aq órtke qarsy qaýipsizdik deńgeıin arttyrý jáne osyndaı jaǵdaıdyń qaıtalanýyna jol bermeý maqsatynda saýda obektileri ókilderiniń (shaǵyn, orta jáne iri kásipkerlik sýbektileri) qatysýymen «Atameken» óńirlik kásipkerler palatalarynyń bazasynda dóńgelek ústelder ótkizipti.
— Adamdar jappaı jınalatyn, jalpy aýdany eki myń sharshy metrden asatyn nysandardyń tizbesi, sondaı-aq adamdar jappaı jınalatyn nysandar ıeleriniń úshinshi tulǵalardyń ómirine, densaýlyǵyna jáne múlkine zalal keltirgeni úshin azamattyq-quqyqtyq jaýapkershiligin mindetti saqtandyrýdyń úlgilik sharty bekitildi. Osy tizimge sáıkes, jańa norma saýda jáne oıyn-saýyq ortalyqtaryna qoldanylady. Engizilgen ózgeristerdiń biri — qurylys tapsyrys berýshisi salynǵan nysannyń órt qaýipsizdigi talaptaryna sáıkestigi jóninde azamattyq qorǵaý organdarynyń qorytyndysyn alý mindetti. Bul talap adamdar jappaı jınalatyn nysandarǵa jáne bıiktigi 28 metrden asatyn ǵımarattarǵa qoldanylady. Nysannyń órt qaýipsizdigi talaptaryna sáıkestigi jónindegi qorytyndyny ýákiletti organnyń aýmaqtyq ókildigi beredi, — dep jazylǵan mınıstrlik hatynda.
Eske sala keteıik, bıyl 18 shildede Astanada «Bıg Shanhaı» úsh qabatty bazary órtke orandy.
Keıin órtten kásipkerlerge kelgen shyǵynnyń eseptelip jatqany habarlandy.
Ókinishke qaraı, tilsiz jaýmen kúres barysynda úsh qutqarýshy jaraqat aldy.