«Bıg Shanhaı» bazaryndaǵy órt: zardap shekken kásipkerlerge qandaı qoldaý kórsetiledi
ASTANA. KAZINFORM — Atalǵan jaǵdaıǵa baılanysty arnaıy shtab quryldy, dep habarlaıdy Astana ákimdiginiń baspasóz qyzmeti.
Onda Tótenshe jaǵdaılar departamentiniń, polıtsııa departamentiniń, ákimdiktiń, ınvestıtsııalar jáne kásipkerlikti damytý basqarmasynyń ókilderi, bank qyzmetkerleri, salyq organdary jáne bazar ákimshiligi kezekshilik etedi. Shtab aıasynda «Bıg Shanhaı» bazarynyń zardap shekken jalǵa alýshylary, kásipkerleri jáne jumysshylary bıznesin qalpyna keltirý, jaldaý, salyqtyq jáne banktik mindettemeler boıynsha keńes ala alady.
Qazirgi ýaqytta salyq tólemderi men banktik mindettemeler boıynsha keıinge shegerý máselesi qarastyrylyp jatyr. Saýda orny zardap shekken kásipkerlerdiń tizimi bankter men qarjy uıymdaryna jiberilip, qoldaý sharalaryn ary qaraı qaraý josparlanyp otyr.
— «Bıg Shanhaı» bazarynyń dırektorynyń aıtýynsha, aldaǵy birneshe kún ishinde zardap shekken barlyq kásipkerge balamaly saýda oryndaryn usyný máselesi sheshiledi. Shtab «Anuar» sýpermarketiniń 3-qabatynda, Alash tasjoly, 30a mekenjaıynda ornalasqan. Aqparat jáne keńes alý úshin koll-ortalyq jumys isteıdi: «Bıg Shanhaı» bazarynyń ákimshisi: +7 (778-14) 1-83-13, Toǵjan. Kásipkerler tek resmı shtabqa júgingeni jón, sebebi barlyq naqty ári shynaıy aqparat osy orynda aıtylady, — delingen ákimdik taratqan aqparatta.
Eske salsaq, ótken túnde Astanada Baıqońyr aýdany Alash tas jolynyń boıyndaǵy úsh qabatty bazar ǵımaraty órtke oranǵanyn jazǵan edik. Belgili bolǵandaı, bazar ákimshiligi órt týraly habarlamaǵan. Órtti birinshi jáne úshinshi qabattyń terezelerinen shyqqan qoıý qara tútindi baıqap qalǵan órt sóndirý bóliminiń qyzmetkerleri ózderi anyqtaǵan. Ókinishke qaraı, órtten úsh qutqarýshy jaraqat aldy.