«Bıg Shanhaı» bazaryndaǵy órt: kásipkerler shyǵyny áli eseptelip jatyr

ASTANA. KAZINFORM — Elordadaǵy «Bıg Shanhaı» bazaryndaǵy órt saldarynan shamamen 300 kásipker shyǵynǵa batty. Bul týraly Saýda jáne ıntegratsııa mınıstri Arman Shaqqalıev málim etti.

— Órttiń sebebi áli anyqtalǵan joq. Tergeý aıaqtalǵannan keıin kináliler mindetti túrde jaýapqa tartylady. Shamamen 300-den astam satýshy zardap shekti, qazir tergeý sharalary júrip jatyr. Osy aıda órt qaýipsizdigi týraly zańǵa engizilgen túzetýler kúshine enedi. Aýmaǵy 2000 sharshy metrden asatyn, adamdar kóp jınalatyn obekti ıelerine úshinshi tulǵalardyń ómiri, densaýlyǵy men múlkine keltirilgen zııan úshin azamattyq-quqyqtyq jaýapkershilikti mindetti saqtandyrý shartyn jasaý talaby qoıylady, — dedi Arman Shaqqalıev Úkimet úıinde ótken baspasóz máslıhatynda.

Mınıstrdiń málimdeýinshe, órtten kelgen shyǵyn áli eseptelip jatyr. 

— Eger «Bıg Shanhaı» bazarynyń qatysýshylary saqtandyrylǵan bolsa, saqtandyrý tóleminen edáýir kólemde ótemaqy alýǵa úmittene alar edi, — dep tolyqtyrdy vedomstvo basshysy.

Eske salsaq, 18 shildede Astanada «Bıg Shanhaı» úsh qabatty bazary órtke orandy.

Keıin bazardaǵy órtten zardap shekken kásipkerlerge qandaı qoldaý kórsetiletini aıtyldy. 

Tilsiz jaýmen kúres barysynda úsh qutqarýshy jaraqat aldy.