«Bıg Shanhaı» bazaryndaǵy órt: 3 elordalyq qutqarýshy jaraqat aldy

ASTANA. KAZINFORM — Ótken túnde Astanada «Bıg Shanhaı» bazary aýmaǵyndaǵy ǵımarattardyń biri órtenip ketti.

Astana Tótenshe jaǵdaılar departamenti basshysynyń orynbasary Qanat Altynbekovtyń aıtýynsha, alǵashqy bólimder kelgen kezde órt ǵımarattyń úsh qabatyn túgel sharpyp úlgergen.

— Teplovızor málimetteri boıynsha syrtqy qabyrǵalardyń temperatýrasy 800 gradýstan asqan. Іshinde ne bolǵanyn elestetińiz. Qurylymdardyń opyrylýy jáne órtti sóndirý barysynda úsh qyzmetkerimiz jaraqat aldy. Olardyń bireýi bas jaraqatyn alyp, aýrýhanaǵa jatqyzyldy, — dedi Qanat Altynbekov.

Órtti sóndirýge Astana qalasy TJD jáne JAO 165 adam, 62 birlik tehnıkasy jumyldyryldy. 

Eske salsaq, ótken túnde Astanada Baıqońyr aýdany Alash tas jolynyń boıyndaǵy úsh qabatty bazar ǵımaraty órtke oranǵanyn jazǵan edik. Belgili bolǵandaı, bazar ákimshiligi órt týraly habarlamaǵan. Órtti birinshi jáne úshinshi qabattyń terezelerinen shyqqan qoıý qara tútindi baıqap qalǵan órt sóndirý bóliminiń qyzmetkerleri ózderi anyqtaǵan.