Bıdaıdyń álemdik baǵasy ortasha merzimdik kezeńde jylyna 2,2 paıyzǵa artatyny boljanady-Q. Bıshimbaev
ASTANA. 1 qarasha. QazAqparat /Qanat Mámetqazyuly/ - Bıdaıdyń álemdik baǵasy ortasha merzimdik kezeńde jylyna 2,2 paıyzǵa artatyny boljanady. Bul týraly búgin QR Parlamenti Senatynda «2011-2013 jyldarǵa arnalǵan respýblıkalyq bıýdjet týraly» zań jobasynyń tanystyrylymy barysynda QR Ekonomıkalyq damý jáne saýda vıtse-mınıstri Qýandyq Bıshimbaev málim etti.
«Aýyl sharýashylyǵy ónimderiniń jalpy aýqymynyń ortasha jyldyq ósimi 2011-2015 jyldary 4,3 paıyzdy quraıdy dep boljanyp otyr. Sonymen qatar, bul kórsetkish 2015 jylǵa qaraı 4,8 paıyzǵa deıin jetedi. Jalpy, aýyl sharýashylyǵy ónimderiniń ósimine egin egý kóleminiń artýymen qosa, astyq sharýashylyǵyndaǵy ónimderge baǵanyń ósý boljamy da sebep bolady», - dedi Q. Bıshimbaev.
Sonymen birge, vıtse-mınıstr halyqaralyq uıymdardyń boljamdaryn da alǵa tartty. Onyń aıtýynsha, bıdaıǵa álemdik baǵa orta merzimdik kezeńde jylyna 2,2 paıyzǵa arta túsetin bolady. Al arpa, kúrishke jáne basqa da daqyldarǵa baǵanyń ósimi jylyna 3 paıyzdy quraýy múmkin.
