Bıdaıdan kıim jasaý tehnologııasy: Іri ınvestor Qazaqstanǵa kelýdi qalaıdy
«Memleket basshysynyń Qytaıǵa jasaıtyn sapary barysynda birneshe iri ınvestormen kelissózder júrgiziledi. Bul - qytaılyq kompanııalar emes, sol jaqta jumys istep jatqan álemdik kompanııalar. Olar bıotehnologııalar boıynsha halyqaralyq patentterdi ustap otyr. Bizde bıdaı kóp qoı. Jańaǵy kompanııalar bıdaı óńdeýdiń «jetinshi satysyn» iske asyrýǵa daıar. Bıdaı óńdeýdiń «ekinshi-úshinshi satysy» ol - un jáne un ónimderi bolsa, besinshi jáne altynshy satyda krahmal men glıýten óndiriledi. Odan qant, sırop jáne taǵy basqa ónimderdi jasaıdy. Al «jetinshi saty» - bul jańa patent. Barlyǵy ony óz eline ákelýge talpynyp júr. Ol patenttiń ıesi - amerıkalyq kásipker. Ózi Gongkongta turady. Patenttiń negizinde bıdaıdan arnaıy sıntetıka jasaýǵa bolady. Bul daıyn mata ǵoı. Odan kıim tigýge múmkindik bar», - dedi A.Myrzahmetov QazAqparat tilshisine bergen suhbatynda.
Palata basshysynyń aıtýynsha, atalǵan kompanııalardyń jetekshileri Memleket basshysy Nursultan Nazarbaevpen kezdesip, óz jobalaryn tanystyrýǵa múddeli.
«Prezıdent ol bastamalardy qoldasa, 2-3 mıllıard dollardy tartýǵa múmkindik bar. Al bıdaıdan sıntetıkalyq materıal jasasaq, sonyń biraz bóligin Qytaıǵa satýǵa ábden bolady. Negizi, ınvestordyń ózi de Qazaqstanǵa kelýdi qalap otyr. Buǵan deıin biz oǵan bıdaıymyzdyń sapasyn, óndiris oryndaryn, bárin-bárin kórsettik. Oǵan unady», - dep atap kórsetti A.Myrzahmetov.
Foto: beta.palata.kz