Bıdaı men júgerini tereń óńdeýge basa nazar aýdarý kerek — Bektenov
ASTANA. KAZINFORM — Premer-mınıstr Oljas Bektenov aýyl sharýashylyǵy ónimderin shıkizat kúıinde emes, tereń óńdelgen ónim túrinde eksportqa shyǵarýdy tapsyrdy.
Búgin Úkimet otyrysynda Aýyl sharýashylyǵy mınıstri Aıdarbek Saparov 2026 jyly iske qosylatyn iri jobalar qatarynda Jambyl oblysyndaǵy júgerini tereń óńdeıtin «Fýfeng Grýp» jobasyn ataǵan edi.
Osy oraıda Úkimet basshysy atalǵan jobanyń bıyl iske qosylýy tıistigin aıtyp, mınıstrge máseleni baqylaýda ustaýdy tapsyrdy.
— Siz «Fýfeng Grýp» jobasyn atap óttińiz. Kelesi jyly emes bıyl birinshi ónim shyǵarý kerek. Iesimen kelistik qoı. Baqylaýǵa alyńyz. Jalpy, bıdaı men júgerini tereń óńdeýge basa nazar aýdarý kerek. Qazirgi tańdaǵy eń mańyzdy basymdyq. Biz shıkizatty emes, tereń óńdelgen ónimdi eksportqa shyǵarýymyz qajet, — dedi Oljas Bektenov.
Aıta ketelik Aıdarbek Saparov aýyl sharýashylyǵy salasynda iske qosylatyn iri jobalardy ataǵan edi.