Bıdaı men júgeri óńdeý salasyna 2,6 mlrd dollar ınvestıtsııa tartylady

ASTANA. KAZINFORM – 2028 jylǵa deıin jylyna 4,8 mln tonna bıdaı men júgeri óńdeıtin 5 iri joba iske qosylady. Bul týraly jyl qorytyndysyna oraı BAQ ókilderimen kezdesken Aýyl sharýashylyǵy mınıstri Aıdarbek Saparov aıtty.

- Ósimniń edáýir bóligin un jáne maı óńdeý ónerkásibi qamtamasyz etip otyr. Bıyl jalpy quny 108,5 mlrd teńgeni quraıtyn 40 jobany iske asyrý qolǵa alyndy. Búgingi tańda onyń ishinde 66,2 mlrd teńgege 29 joba paıdalanýǵa berildi. Іske qosylǵan jobalar maıly daqyldardy, etti, jemisterdi, júndi qaıta óńdeýdi, qurama jem óndirisin jáne basqa da baǵyttardy qamtıdy, - dedi mınıstr.

Onyń aıtýynsha, qaıta óńdeý salasy agroónerkásiptik keshenge ınvestıtsııa tartý boıynsha kóshbasshy baǵyttardyń biri sanalady.

- Qazirgi ýaqytta, ásirese astyqty tereńdete óńdeý segmentinde iri jobalar iske asyrylyp jatyr. Jalpy alǵanda, Qazaqstan jyl saıyn 5 mln tonnadan astam astyqty óńdeıdi. Onyń ishinde 510 myń tonnasy tereń óńdeýge jiberiledi. Búginde krahmal, glıýten, melassa, bıoetanol jáne ózge de ónimder shyǵaratyn 3 tereń óńdeıtin kásiporyn jumys isteıdi. 2028 jylǵa deıin jylyna 4,8 mln tonna bıdaı men júgerini óńdeıtin 5 iri jobany iske qosý josparlanyp otyr. Salaǵa tartylatyn ınvestıtsııa kólemi 2,6 mlrd AQSh dollaryn quraıdy, 3,3 myń jańa jumys orny ashylady. Ónim assortımenti amınqyshqyldary, sıroptar, dárýmender jáne ózge de joǵary qosylǵan qundy ónimder esebinen keńeıtiledi, - dedi Aıdarbek Saparov.

Buǵan deıin Aıdarbek Saparov aýyl sharýashylyǵy salasynda iske qosylatyn iri jobalardy ataǵan edi.