Bıdaı egý azaıyp, rentabeldiligi joǵary daqyldar aýmaǵy artady – AShM

ASTANA. KAZINFORM – Bıyl elimizde aýyl sharýashylyǵy daqyldary egiletin aýmaq byltyrǵy jylǵa qaraǵanda 518 myń gektarǵa artady. Bul týraly Úkimet otyrysynda AShM basshysy Aıdarbek Saparov aıtty.

— Aýyl sharýashylyǵy jalpy ónimin 2 esege ulǵaıtý boıynsha jol kartasyna sáıkes bıyl da egis alqaptaryn ártaraptandyrý jumysy jalǵasatyn bolady. Barlyq ındıkator ákimdikterge jetkizildi. Jalpy, aýyl sharýashylyǵy daqyldaryn 23,8 mln gektar jerge ornalastyrý josparlanyp otyr. 
Bul ótken jyldyń deńgeıinen 518 myń gektarǵa kóp, - dedi ol.

Onyń aıtýynsha, bıyl ártaraptandyrý baǵdarlamasy 1 mln gektarǵa jýyq alqapty qamtıdy.

— Osylaısha, rentabeldiligi joǵary daqyldardyń aýmaǵy 750 myń gektarǵa artatyn bolady, onyń ishinde maıly daqyldar alańy 365 myń gektarǵa, azyqtyq daqyldar – 184 myń gektarǵa, arpa – 114 myń gektarǵa, qaraqumyq – 41,5 myń gektarǵa, kartop – 15 myń gektarǵa ulǵaıady. Bul rette bıdaı monodaqylynan basqa daqylǵa aýysý boıynsha aýqymdy jumys jalǵasyp jatyr. 2 jyl ishinde bıdaı alańy 730 myń gektarǵa, sonyń ishinde bıyl 159 myń gektarǵa qysqardy, - dedi mınıstr.

Vedomstvo basshysy qazirgi ýaqytta maıly daqyldar men burshaq daqyldary ishki jáne syrtqy naryqtarda suranysqa ıe jáne olardyń baǵasy turaqty joǵary deńgeıde ekenin aıtty.

- Máselen, bıdaıdyń ortasha baǵasy tonnasyna 65-70 myń teńge bolsa, zyǵyr jáne raps sııaqty eksportqa baǵyttalǵan daqyldardyń baǵasy 200 myńǵa deıin barady jáne odan da joǵary, - dedi Aıdarbek Saparov.

Eske salsaq Qazaqstan 2025 jyly Grýzııaǵa 80 myń tonna bıdaı eksporttaıdy.