Bıdaı baǵasynyń qymbattaýy nan baǵasyna áser etpeýi tıis - AShM
ASTANA. 10 shilde. QazAqparat - Qazirgi oryn alǵan naryqtaǵy jaǵdaıǵa sáıkes, bıdaı baǵasynyń qymbattaýy nan baǵasyna áser etpeýi tıis.
Bul týraly búgin Aýyl sharýashylyǵy mınıstrliginde ótken brıfıng barysynda «Agroónerkásip keshenindegi ekonomıkalyq saıasatty taldaý ortalyǵy» JShS dırektory Saǵyntaı Jumajanov osylaı málim etti.
«Qymbattamaýǵa tıis. Sebebi bizde astyqtyń, unnyń, nan baǵasyn turaqtandyrý úshin «Azyq-túlik kelisimshart korporatsııasy» AQ astyqty satyp alyp turady. Osy kompanııada ázirdiń ózinde 5 mln. tonnaǵa jýyq astyq bar. Sondyqtan da, korporatsııa ishki naryqty turaqty baǵamen qamtýǵy tyrysady. Budan bólek, eger astyq baǵasy nan baǵasyna áser etetindeı jaǵdaı baıqalsa, buǵan deıin de qoldanylyp kelgen tájirıbeler iske qosylady. Jalpy bizdiń astyqqa qatysty ishki naryqty retteýge tolyq múmkindigimiz barshylyq», - deıdi Saǵyntaı Jumajanov.
Esterińizge sala keteıik, Halyqaralyq astyq keńesi 2012-2013 marketıng jylynda álemdegi bıdaı óndirisiniń kólemin 665 mln. tonnaǵa boljaǵan edi. Bul mamyr aıyndaǵy boljamnan 6 mln. tonnaǵa, ótken jylǵy maýsymnyń deńgeıinen 30 mln. tonnaǵa az kórsetkish. Al álemdik bıdaı óndirisiniń azaıýyna basty sebep - qurǵaqshylyq saldarynan Eýroodaq elderindegi, Avstralııa men Argentınadaǵy, Reseıdegi, Ýkraına men Qazaqstandaǵy bıdaı óndirý kóleminiń tómendeýine baılanysty bolyp tabylady. Osyǵan oraı, álemdik jáne elimizdiń ishki naryǵynda astyq baǵasy qymbattaýda.
