Bıdi bir-aq kúnde shyǵardyq — Djeı Loǵa unaǵan qoıylym qalaı daıyndaldy

ASTANA. KAZINFORM — Birneshe kún buryn astanalyq jankúıerlerdiń bıi Djennıfer Lopestiń nazaryna ilikkenin habarlaǵan edik. Jas talanttar kópshiliktiń qoshemetine ıe bolǵan bul bı qoıylymyn bir-aq kúnde daıyndap shyqqan.

Bul týraly DREAM WAY dance & art lab shyǵarmashylyq ortalyǵynyń zamanaýı bı boıynsha jattyqtyrýshysy agenttik tilshisine bergen suhbatynda aıtty.

— Vıdeony túsirý ıdeıasyn bizge Djennıfer Lopestiń Astanadaǵy kontsertin uıymdastyryp jatqan Malık Hasenov usyndy. Jattyqtyrýshylar bul oıdy birden qoldady. Bar bolǵany bir kúnniń ishinde Donık ekeýmiz bıdi qoıyp úlgerdik. Al kelesi kúni oqýshylar bıdi jattap, Báıterek mańynda beınerolıkti túsirip tastadyq, — deıdi Karına Sınthalat.

Bı toby beınejazbany áleýmettik jelige júktegende, ony Djeı Lonyń ózi paraqshasynda bólisetinin bilmegen kórinedi. Dese de, eńbekteri ataqty ánshiniń nazaryna iligedi dep úmittengenderin jasyrmady.

— Árıne, biz Lopestiń vıdeony baıqap, áleýmettik jelide qandaı da bir reaktsııa bildiredi degen úmitte boldyq. Biraq tolyqtaı senimdi bolmadyq. Postty repost jasaıdy dep júz paıyz senbedik. Sondyqtan ol bizdiń vıdeomyzdy paraqshasyna salǵanda — bárimizdiń qýanyshtan tóbemiz kókke jetti! Osy arqyly 2 mıllıonnan astam adam bizdiń talantty oqýshylarymyzdyń ónerin kórdi. Jelide qanshama jyly pikir men qoldaý sózder jazylyp jatty. Osy úshin bárińizge alǵys aıtqymyz keledi! — deıdi olar.

Eske sala keteıik, buǵan deıin latynamerıkalyq juldyzdyń elordada ótetin kontsertine bılet tolyq satylǵanyn habarlaǵan edik.