Bıbisara Asaýbaeva Úmitkerler týrnırindegi ornyn jaqsartty
ASTANA. KAZINFORM – Kıprdiń Pafos qalasynda ótip jatqan Úmitkerler týrnıri – 2026 shahmat jarysynyń toǵyzynshy týrynyń qorytyndylary jarııalandy, dep habarlaıdy FIDE baspasóz qyzmeti.
Toǵyz týrdyń nátıjesi boıynsha qazaqstandyq shahmatshy Bıbisara Asaýbaeva 4 upaı jınap, reseılik Aleksandra Gorıachkınamen birge jetinshi oryndy bólisip tur. Týrnır kestesiniń sońǵy, segizinshi satysynda qytaılyq Tan Chjýnı ornalasqan.
Toǵyzynshy týrda blıts shahmattan eki dúrkin álem chempıony Bıbisara Asaýbaeva Aleksandra Gorıachkınamen teń túsip, eki sportshy da 0,5 upaıdan enshiledi.
Aıta keteıik, altynshy týrdan keıin qazaqstandyq shahmatshy týrnır kestesiniń sońǵy ornynda bolǵan. Alaıda úndistandyq Vaıshalı Rameshbabý jáne Aleksandra Gorıachkınamen ótken teń oıyndar onyń týrnırlik jaǵdaıyn jaqsartyp, bir saty joǵary kóterilýine múmkindik berdi.
Úmitkerler týrnıri – 2026 jarysy 28 naýryz ben 16 sáýir aralyǵynda ótedi. Jalpy 14 týr josparlanǵan.
Jarys jeńimpazy qazirgi álem chempıony, qytaılyq Tszıýı Ventszıýnmen álem chempıony ataǵy úshin match ótkizý quqyǵyna ıe bolady.
Aıta keteıik, buǵan deıin Bıbisara Asaýbaeva Kıprdegi týrnırde kósh basynda kele jatqany habarlanǵan bolatyn.
