Bıbisara Asaýbaeva Norway Chess Women 2026 halyqaralyq shahmat týrnıriniń jeńimpazy atandy
ASTANA. KAZINFORM - Otandasymyz Bıbisara Asaýbaeva shahmattan ótken Norway Chess Women 2026 halyqaralyq týrnırinde merziminen buryn 1-oryn aldy, dep habarlaıdy QR Týrızm jáne sport mınıstrligi Sportty damytý dırektsııasynyń baspasóz qyzmeti.
25 mamyrda bastalǵan báseke (5 maýsymǵa deıin) Oslo qalasynda (Norvegııa), Deichman Bjørvika mádenı ortalyǵynda ótti.
Jarysqa 4 elden (Qytaı, Úndistan, Ýkraına jáne Qazaqstan) jınalǵan álemniń eń myqty 6 shahmatshysy qatysty.
Bıbisaranyń qarsylastary: Tszıýı Ventszıýn (Qytaı) - qazirgi álem chempıony; Chjý Tszıner (Qytaı) - álem reıtınginde 2-oryndaǵy shahmatshy; Hampı Konerý (Úndistan) - álem shahmatynyń beldi ókili; Anna Mýzychýk (Ýkraına) - «Norway Chess Women» týrnıriniń byltyrǵy jeńimpazy; Dıvıa Deshmýkh (Úndistan) - álem kýbogynyń ıegeri.
Bul týrnır Bıbisara úshin debıýt (alǵashqy) boldy. Soǵan qaramastan, ol týrnır tarıhyndaǵy eń jas qatysýshy bolyp otyr.
Týrnır formaty: jarys eki aınalymdy júıede ótti, ıaǵnı ár oıynshy bir-birimen eki retten oınady. Klassıkalyq partııada teń túsken jaǵdaıda, jeńimpaz «Armageddon» (mindetti túrde jeńimpazdy anyqtaıtyn erekshe ereje boıynsha ótetin sheshýshi partııa) arqyly anyqtaldy.
Osyǵan deıin habarlaǵanymyzdaı, Bıbisara Asaýbaeva Norway Chess Women 2026 týrnırinde álem chempıonyn jeńgen bolatyn.
Aıta keteıik, jýyrda Memleket basshysy Qasym-Jomart Toqaev Bıbisara Asaýbaevany ІІ dárejeli «Barys» ordenimen marapattaǵan bolatyn.
