Bıbisara Asaýbaeva FIDE týrnırinde qansha tabys tapty
ASTANA. KAZINFORM – Qazaqctandyq shahmatshy Bıbisara Asaýbaevaǵa FIDE úmitkerler týrnırine qatysqany úshin tólenetin júlde qorynyń naqty kólemi jarııalandy, dep habarlaıdy Kazinform.
Asaýbaeva Úmitkerler týrnırinde klassıkalyq shahmattan álem chempıony tıtýlyna irikteýden óte almasa da, úıine qur qol oralmaıdy.
Týrnır erejelerinde qazaqstandyq oıynshy jalpy esepte ekinshi oryn alǵany úshin 17 myń eýro alatyny kórsetilgen. Uıymdastyrýshylar árbir 0,5 upaı úshin qosymsha 2200 eýro tóleıdi. Bıbisara aktıvinde segiz upaı bar, bul oǵan taǵy 17 600 eýro ákeldi.
Qazaqstannyń eń tanymal shahmatshylarynyń biri jalpy alǵanda 34 600 eýro júlde qoryn jeńip aldy, bul qazirgi baǵam boıynsha 19,3 mln teńgeden asyp otyr.
Aıta ketý kerek, buǵan deıin Qazaqstan ókilderi eki jylda bir ret ótkiziletin jáne álemniń eń úzdik shahmatshylaryn biriktiretin Úmitkerler týrnırine joldama almaǵan. Sondyqtan Bıbisara Asaýbaevanyń osy deńgeıdegi jarystaǵy debıýtinde ekinshi oryn alýy – laıyqty jetistik.
Qazaqstandyq sportshy óz ónerine túsinikteme bere otyryp otandastaryna qatelikterin túzetip, eki jyldan keıin úmitkerler týrnırine qaıtadan joldama alýǵa ýáde berdi.
- 2026 jylǵy áıelder arasyndaǵy Úmitkerler týrnıri aıaqtaldy. Ókinishke qaraı, sońynda sál sátsizdikke ushyrap, ekinshi oryn aldym. Alda qatemen jumys isteý kerek, men kúshtirek bolyp oralamyn. Elimizdi eń joǵary deńgeıde tanytqanyma maqtanamyn jáne alda áli de kóp nárse bar. Qoldaý kórsetkenderińiz úshin barshańyzǵa alǵys aıtqym keledi, bul men úshin óte mańyzdy jáne qundy. Alǵa jyljıyq, - dep jazdy sportshy Instagram-da.
Eske salsaq, qazaqstandyq shahmatshy Bıbısara Asaýbaeva 2026 jylǵy FIDE áıelder arasyndaǵy jarysqa úmitkerler týrnırinde ekinshi orynǵa turaqtady.
Jeńiske jetý úshin oǵan tek 0,5 upaı jetpeı qaldy.
