Bıbisara Asaýbaeva FIDE reıtınginde áıelder arasynda kósh bastady
ASTANA.KAZINFORM — 8 maýsymda Halyqaralyq shahmat federatsııasy (FIDE) Norway Chess Women týrnıri aıaqtalǵannan keıin álemdik reıtıngtiń jańartylǵan nusqasyn jarııalady. Soǵan sáıkes, qazaqstandyq grossmeıster Bıbisara Asaýbaeva áıelder arasyndaǵy reıtıngte kósh bastady.
FIDE málimetinshe, reıtıngke áser etetin Norway Chess Women týrnıri (FIDE Women’s Circuit esepteýine kiretin eki jarystyń biri) bıylǵy mamyr–maýsym aılaryndaǵy jalpy kestedegi kúshterdiń araqatynasyn aıtarlyqtaı ózgertti.
— Bıbisara Asaýbaeva bul týrnırdegi jeńisiniń arqasynda 29,7 upaı jınap, jalpy esepte birinshi orynǵa kóterildi. Odan keıin 21,6 upaımen qytaılyq shahmatshy Chjý Tszıner ekinshi orynǵa shyqty. Ekeýi de burynǵy kóshbasshy Vaıshalı Rameshbabýdan ozyp ketti, ol qazir úshinshi orynda, — delingen FIDE habarlamasynda.
Erler arasynda kóshbasshylyqty ózbekstandyq Nodırbek Abdýsattorov saqtap qaldy.
— Mamyr aıyndaǵy týrnırlerden keıin Nodırbek Abdýsattorov FIDE Circuit 2026–2027 jarysynda Javohır Sındarovtan sál ǵana alda tur. Abdýsattorov TePe Sigeman týrnırinde 7,25 upaı jınasa, Sındarov Super Chess Classic Romania jarysynda 8,53 upaı alyp, araqashyqtyqty qysqartty, — dep atap ótti federatsııa.
Úshinshi orynda Super Rapid and Blitz Poland jáne Super Chess Classic Romania týrnırlerinde jalpy 28,93 upaı jınaǵan amerıkalyq grossmeıster Fabıano Karýana qalyp otyr.
Aıta keteıik, Bıbisara Asaýbaeva Norway Chess Women-de kósh bastaǵan bolatyn.
Ol Norway Chess Women 2026 halyqaralyq shahmat týrnıriniń de jeńimpazy atandy.
