Bıbisara Asaýbaeva álemdik reıtıngte birinshi bolýdy maqsat etip otyrǵanyn málimdedi

Instagram jelisinde shahmatshy úzdik bestikke engennen keıingi kóńil-kúıi týraly aıtty.

«Shynymdy aıtsam, árbir jetistigimnen keıin ómirim ózgeredi dep oılaımyn. Al jetistikterim az emes: álem chempıony ataǵyn úsh ret jeńip aldym, grossmeıster atandym, Úmitkerler týrnırinde ekinshi oryn ıelendim, Norvegııadaǵy týrnırde jeńiske jettim, álemdik reıtıngtiń úzdik bestigine kirdim. Biraq ózimdi qabyldaýymda aıtarlyqtaı ózgeris bolǵan joq. Birinshi orynǵa shyqsam, sonda bári ózgeretin shyǵar», – dedi Bıbisara Asaýbaeva.

Onyń aıtýynsha, sońǵy jyldary motıvatsııasy da ózgergen.

«Qazir oıyn protsesiniń ózinen lázzat alamyn. Maǵan shahmat óte unaıdy, onsyz ózimdi jaısyz sezinemin. Al qysymǵa kelsek, sońǵy bes jylda ol shamamen birdeı boldy. Tek Úmitkerler týrnırinde ǵana qatty qobaljydym. Tipti bárin tastap ketkim kelgen kezder de boldy. Biraq ol kezeń artta qaldy», – dedi sportshy.

Bıyl 22 jastaǵy Bıbisara Asaýbaeva tarıhı jetistikke jetip, alǵash ret Halyqaralyq shahmat federatsııasynyń (FIDE) shilde aıyndaǵy reıtınginde 2538 upaımen álemniń úzdik bes shahmatshysynyń qataryna endi.

Sondaı-aq maýsym aıynda Osloda ótken Norway Chess Women 2026 halyqaralyq týrnırinde merziminen buryn jeńiske jetip, osy týrnırdi utqan alǵashqy qazaqstandyq atandy. Buǵan qosa, FIDE Women’s Circuit 2026–2027 maýsymynyń jalpy esebinde kósh bastady.

Sporttaǵy joǵary jetistikteri men el sportynyń damýyna qosqan úlesi úshin Bıbisara Asaýbaeva ІІ dárejeli «Barys» ordenimen marapattaldy.