Bıbisara Asaýbaevaǵa til tıgizgeni úshin reseılik bapker jarystardan shettetildi
ASTANA. QazAqparat - Reseılik bapker Evgenıı Solojenkın shahmatshy Bıbisara Asaýbaevaǵa álem chempıonatynda elektrondy nusqaýshynyń kómegin paıdalandy dep aıyp taqqan bolatyn. FIDE etıkasy boıynsha komıssııa sheshimi negizinde reseılik bapker jalǵan aıtyp, jala japqany úshin barlyq týrnırlerden shettetildi. Bul týraly qazaqstandyq shahmatshynyń advokaty Aleksandr Dobrovınskıı Feısbýk paraqshasynda jazdy.
«Qurmetti dostar! Men halyqaralyq shahmat federatsııasynyń (FIDE) 30 betten turatyn sheshimin ustap otyrmyn. Osy sheshimge sáıkes, grossmeıster Solojenkın Bıbisara Asaýbaevaǵa jalǵan aıtyp, kiná taqqany úshin barlyq týrnırlerden shettetildi. Sot sheshimi tolyqtaı orys tiline aýdarylyp, Feısbýk jelisine jarııalanady. Bul jalaqorlyqqa qarsy kúrestegi úlken jeńis. Aldyda bizdi áli 28 naýryzda ótetin sot kútip tur. Barlyqtaryńyzǵa qoldaýlaryńyz úshin rahmet!»,-dep jazdy Dobrovınskıı.
Ótken jyldyń qyrkúıeginde reseılik bapker Evgenıı Solojenkın Bıbisara Asaýbaevanyń álem chempıonatynda elektrondy nusqaý berýshini paıdalandy degen pikir bildirdi. Al advokat Dobrovınskıı Bıbisarany qorǵaıtynyn aıtqan jáne ol týraly Feısbýk paraqshasynda jarııalady. Oqıǵanyń mán-jaıyn anyqtaý úshin taraptarǵa sotqa qaıyrylýǵa týra keldi.
«Qazaqstannyń shahmat federatsııasy» RQB osy oqıǵaǵa qatysty pikir bildirdi.
Bıbisara Asaýbaeva birneshe dúrkin Qazaqstan chempıony jáne álem chempıonatynyń júldegeri. Ol 7 jasynda-aq FIDE-niń áıelder arasyndaǵy sheberi ataǵyn jeńip alǵan bolatyn. 2016 jyly jas shahmatshy Reseıge ketip, osy eldiń namysyn qorǵaýǵa bel býdy. Mınskide ótken erler arasyndaǵy Eýropa chempıonatynda 13 jastaǵy Bıbisara Asaýbaeva halyqaralyq erler arasyndaǵy sheberlik normasyn oryndap, avtomatty túrde FIDE-niń erler arasyndaǵy sheberi atandy.
Bıbisara Asaýbaeva Tarazda týyp, Qazaqstan týynyń astynda 4 ret álem chempıonatyn jeńip aldy. Alaıda ol qazir Reseı memleketiniń atynan óner kórsetip júr.
