Bıbisara Asaýbaeva Jańaózende kishkentaı shahmatshylarǵa sheberlik saǵatyn ótkizdi

JAŃAÓZEN. QazAqparat - Jańaózen qalasyna jyldam shahmattan (blıts) álem chempıonatynyń jeńimpazy Bıbisara Asaýbaeva is-saparmen keldi. Grossmeıster oqýshylar shyǵarmashylyq úıiniń kishkentaı shahmatshylarymen bir partııa shahmat oınap, sheberlik saǵatyn kórsetti, dep habarlaıdy QazAqparat qala ákimdiginiń baspasóz qyzmetine silteme jasap.

- Jańaózenge is-saparmen kelý Bıbisaranyń óziniń talaby boldy. Maqsatymyz - kishkentaı baldyrǵandardyń shahmatqa qyzyǵýshylyǵyn arttyrý ári olarǵa bilgenin úıretý boldy. Naýryzda shahmattan QR chempıonaty ótedi. Soǵan 215 qatysýshylardan 100-ge tarta qatysýshy irikteýden ótti. Jańaózendik shahmatshylar da biraz jetistikterge jetip júr. Bul bizdi qýantady. Bıyl 3-4 úlken týrnır ótkizý josparymyzda bar. Buǵan oblys boıynsha barlyq qatysýshylar qatysa alady, - deıdi Mańǵystaý oblystyq shahmat federatsııasynyń prezıdenti, atqarýshy dırektor Fatıma Elbaeva.

Álem shahmaty tarıhyndaǵy eń jas chempıon atanǵan sportshyny qala ákiminiń orynbasary Jańabaı Aımaǵanbetov, bilim bóliminiń basshysy Óserbaı Tabynchaev jáne qala jastary qarsy aldy.

Olar álem chempıonyna alǵys aıtyp, sáttilik tiledi.

Kásibı sportshylarmen oınaýdy armandaǵan jańaózendik shahmatshylar sheberlik saǵatynan mol tájirıbe aldy.

Foto: t.me/mangystau_press