Bıbisara Asaýbaeva: Shahmattan el tarıhyndaǵy alǵashqy «altyndy» ıelengenim úshin baqyttymyn

NUR-SULTAN. QazAqparat - Búgin elordanyń Halyqaralyq áýejaıynda shahmattan álem chempıony Bıbisara Asaýbaevany kútip alý issharasy ótti. Jas shahmatshyny jaqyndary men jankúıerleri ystyq yqylaspen qarsy alyp, gúl shoqtaryn syılady, dep habarlaıdy QazAqparat tilshisi.

Bıbisarany jarqyn jeńisimen quttyqtaýǵa QR Mádenıet jáne sport mınıstrligi Sport jáne dene shynyqtyrý isteri komıtetiniń tóraǵasy Samat Erǵalıev áýejaıǵa arnaıy bardy. S.Erǵalıev Bıbisaranyń jetistigine anasynyń qosqan úlesin erekshe atap ótip, alǵysyn bildirdi.

«Shahmattan álem chempıonatynda eń jas álem chempıony atanyp, jarqyn jeńisimen qazaq elin qýantqany úshin Bıbisaraǵa alǵysymdy bildiremin. Bıbisaranyń jeńisine anasynyń qosqan úlesi zor. Otandasymyzdyń bul jeńisi barsha shahmatshylarǵa úlgi bolyp, el sportynyń tarıhynda qalary sózsiz» - dedi komıtet tóraǵasy.

«Týrnır ońaıǵa soqpady. Úsh kún rapıd, eki kún blıts, bes kúnge sozylǵan jarysta sońyna deıin tabandylyq kórsetý kerek boldy. Men birinshi taqtada oınap rapıdte sońǵy partııany jeńip, ekinshi oryndy ıelendim. Blıtste segizinshi aınalymnan bastap, kósh bastadym. Aqtyq kezeńge deıingi aınalymda aıqyn basymdylyqpen birinshi orynǵa kóterildim. El tarıhynda eresekter arasyndaǵy shahmattan alǵashqy altyn júldeni jeńip alǵanym úshin óte baqyttymyn» - dedi shahmattan Álem chempıonatynyń jeńimpazy.

QR Sport jáne dene shynyqtyrý isteri komıtetiniń baspasóz qyzmeti Polsha astanasy Varshava qalasynda ótken Álem chempıonatynda 17 jastaǵy qazaqstandyq shahmatshy Bıbisara Asaýbaeva blıtste birinshi oryndy jeńip alyp, álemdik shahmat tarıhynda áıelder arasynda eń jas shahmatshy atanǵanyn eske salady. Sondaı-aq atalǵan chempıonatta Bıbisara jyldam shahmattan (Rapıd) 2-oryn ıelendi.