Bıbisara Asaýbaeva shahmattan álem chempıony ataǵy úshin kimdermen baq synaıdy
ASTANA. KAZINFORM - 29 naýryz ben 15 sáýir aralyǵynda Kıpr aralynda shahmat táji úshin talasatyn úmitkerlerdiń jarysy ótedi. Bul synda qazaq eliniń namysyn tuńǵysh ret halyqaralyq grossmeıster Bıbisara Asaýbaeva qorǵamaq.
22 jastaǵy Bıbisaranyń esimi qazirdiń ózinde shahmat tarıhynda altyn áriptermen jazylǵan. Blıtsten álemniń úsh dúrkin chempıony atanyp, bul belesti baǵyndyrǵan eń jas shahmatshy retinde Gınnes rekordyn jańartqan.
2025 jyly Varshava men Samarqandtaǵy jeńisti jolyn jalǵap, úshinshi altynyn ıelený arqyly ol osy týrnırge joldama aldy. Onyń qorjynynda Olımpıadanyń kúmis júldesi men erler arasyndaǵy «Tata Steel Chess Challengers 2026» týrnırindegi úzdik bestikke engen jetistigi de bar.
Bıbısaranyń aldynda turǵan asý ońaı emes. Oǵan álemniń eń tańdaýly 7 shahmatshysy qarsy turady:
Qytaılyq Chjý Tszıner – (23 jas, Qytaı, reıtıngi 2578) 2024–2025 jyldardaǵy Gran-prı dodasynyń jeńimpazy.
Aleksandra Gorıachkına – (27 jas, FIDE-niń beıtarap qatysýshysy, reıtıngi 2534) 2024–2025 jyldardaǵy Gran-prı dodasynyń kúmis júldegeri.
Dıvıa Deshmýh – (20 jas, Úndistan, reıtıngi 2497) 2025 jyly Batýmıda (Grýzııa) ótken álem kýbogynyń jeńimpazy.
Hampı Konerý – (35 jas, Úndistan, reıtıngi 2535) 2025 jyly ótken álem kýbogynyń kúmis júldegeri.
Tan Chjýnı – (34 jas, Qytaı, reıtıngi 2535) ) 2025 jyly ótken álem kýbogynyń qola júldegeri. Sondaı-aq 2017-2018 jyldardaǵy álem chempıony.
Vaıshalı Rameshbabý – (14 jas, Úndistan, reıtıngi 2470) Samarqandta ótken 2025 jylǵy FIDE Úlken shveıtsarııalyq jarysynyń jeńimpazy.
Katerına Lagno – (36 jas, FIDE-niń beıtarap qatysýshysy, reıtıngi 2508) 2025 jylǵy FIDE Úlken shveıtsarııalyq jarysynyń kúmis júldegeri.
Bul qatysýshylardyń tórteýi buǵan deıin álem chempıony ataǵy úshin baq synaǵan. Al Bıbisara úshin bul alǵashqy beles. 35 jastaǵy qytaılyq shahmatshy Tszıýı Ventszıýn 2018 jyldan beri álem chempıony ataǵyn eshkimge bermeı keledi. Osyǵan deıin Hampı Konerý, Katerına Lagno, Aleksandra Gorıachkına jáne Tan Chjýnı sııaqty myqtylar chempıondyq matchtarda Tszıýı Ventszıýnge ese jibergen bolatyn.
Bıbisara Asaýbaeva bul dodaǵa alǵash ret qatysyp otyrsa da, onyń sońǵy kezdegi jetistikteri men álemdik reıtınginiń úzdik ondyǵyna enýi úlken úmit syılaıdy.
Aıta keteıik, jarys 14 týrdan turatyn aınalmaly júıe boıynsha ótedi. Klassıkalyq shahmattyń tártibi boıynsha ár oıynshyǵa alǵashqy 40 júriske 90 mınýt, al partııa sońyna deıin 30 mınýt beriledi. Jalpy júlde qory 300 000 eýrony quraıdy.
Erler arasynda ótetin jarysqa elimizden eshkim qatyspasa da, búkil eldiń nazary Bıbisarada bolmaq.
Eske sala keteıik, Bıbisara buǵan deıin shahmattan 12-shi álem chempıonyn jeńgen edi.
