Bıbisara Asaýbaeva halyqaralyq týrnırdiń basty favorıtin jeńdi

ASTANA. QazAqparat - Máskeýde ótip jatqan «Shahmat juldyzdary» atty halyqaralyq týrnırde sensatsııa boldy. Blıts shahmattan eki dúrkin álem chempıony Bıbisara Asaýbaeva rapıdte básekeniń basty favorıti Sergeı Karıakındi jeńdi, dep habarlaıdy Sportty damytý dırektsııasynyń baspasóz qyzmeti.

Reseılik shahmatshy álemdegi eń myqty grossmeısterdiń biri. Qazirgi ýaqytta onyń 2 739 upaıy bar.

Týrnır kommentatorlarynyń aıtýynsha, Bıbisaranyń blıtste álem chempıony bolǵany beker emes. Ol óziniń salqynqandylyǵymen Sergeıdiń myqty qorǵanysyna tótep berip, jeńiske jetti.

Eki myqtynyń oıyny mazmuny jaǵynan da, nátıjesi jaǵynan da týrdyń sánin keltirdi. Bıbisara buǵan deıin suhbattarynda osy týrnırde Sergeı Karıakın jáne Teımýr Radjabovpen oınaǵysy keletinin birneshe ret aıtqan.

Óz kezeginde reseılik grossmeıster mundaǵy jalǵyz jeńilisinen uıalmaıtynyn málimdedi.

«Men óte jaqsy oınaıtyn álem chempıonynan utyldym», - dep aıtty Karıakın oıynnan keıin.

Aıta keteıik, bul jarystyń júlde qory 15 mıllıon rýbl. Qazir munda álemdegi eń myqty shahmatshylar sheberlik baıqasyp jatyr. Olardyń qatarynda Bıbisara Asaýbaeva, Sergeı Karıakın, Aleksandr Grışýk, Teımýr Radjabov, Raýnaký Sadvanı, Fransısko Valeho, Vladıslav Artemev, Ekaterına Lagno jáne basqalary bar.

Bir qyzyǵy, qazaqstandyq grossmeıster týrnırge qatysatynyn jarys bastalardan eki kún buryn bilgen. Bıbısara álem chempıony Vladımır Kramnıktiń ornyn basqan.

Rapıd básekesi 24-26 qańtarda ótti. Endi blıts túrinde (28 jáne 30 qańtar) Bıbısara Asaýbaeva áli de óz sheberligin kórsetedi dep senemiz.