Bıbisara Asaýbaeva budan bylaı jarystarǵa Mańǵystaýdyń atynan qatysady
AQTAÝ. QazAqparat - 15 jasar álemge tanymal shahmatshy Bıbisara Asaýbaeva Qazaqstanǵa oraldy, dep xabarlaıdy QazAqparat tilshisi.
Anasy Lıana Tanjarıkovanyń aıtýynsha, Bıbisara endi jarystarǵa Mańǵystaýdyń atynan qatysady.
«Biz osyǵan deıin Reseıde biraz jetistikterge jettik. Bıbisara myqty mektepten ótti. Reseıden elimizge oralýdy josparlaǵaly biraz boldy. Mańǵystaýǵa jarysqa kelgen kezde oblys ákimi usynys jasady. Oılanyp, osyndaı sheshimge keldik. Endi Bıbisaranyń Qazaqstan namysyn qorǵaıtynyna qýanyshtymyn»,- deıdi Lıana.
Oblys ákimi Eraly Toǵjanov Bıbisarany jeke qabyldap, erekshe alǵysyn aıtty.
«Qasıetti Mańǵystaýǵa qosh keldińizder. Kıeli mekenge shaqyrtýymdy qabyl alyp, óńir sportynyń damýyna úles qosatynyńyzǵa rızamyn. Buıyrsa oblysta Bıbisaranyń atynan shaxmat mektebin ashyp, osy sporttyń aımaqta órkendeýine kúsh salamyz. Qadamyńa sáttilik!»,-dedi oblys ákimi.
Aıta keteıik, Bıbisara Asaýbaeva osyǵan deıin týrnırlerge Reseıdiń atynan qatysyp kelgen edi. 15 jasar výnderkındti shaxmattyń xanshaıymy dep te ataıdy. Anasy Bıbisaraǵa AQSh-tan da shaqyrtý kelgenin aıtty.
Eske sala keteıik, biz buǵan deıin Bıbisara Asaýbaevanyń Qazaqstanǵa qalaı oralǵany týraly jazǵan bolatynbyz.
