Bıbisara Asaýbaeva alǵash ret Qazaqstan atynan Úmitkerler týrnırine qatysady

ASTANA. KAZINFORM – Blıtsten úsh dúrkin álem chempıony Bıbisara Asaýbaeva naýryz aıynda Kıprde ótetin Úmitkerler týrnırinde Qazaqstandy alǵash ret tanystyrady. Bul týraly shahmatshy Astanada jýrnalıstermen ótken kezdesýde málimdedi.

Onyń aıtýynsha, blıtsten úshinshi márte álem chempıony ataný mansabyndaǵy eń qıyn jetistikteriniń biri bolǵan. Týrnır jańa formatta ótip, shveıtsarııalyq júıeden keıin úzdik tórt qatysýshy nokaýt kezeńine shyqqan. Bul jarys Úmitkerler týrnırine irikteýde sheshýshi mańyzǵa ıe bolǵan.

– Fınalǵa shyqqan kezde Úmitkerler týrnırine joldama alǵanymdy bildim. Negizgi maqsat oryndaldy, biraq matchta jeńilgim kelmedi. Jartylaı fınal men fınaldy senimdi ótkizdim dep oılaımyn. Degenmen bul men jeńip alǵan álem chempıonattarynyń ishindegi eń aýyr jarys boldy, – dedi Bıbisara.

Halyqaralyq jarystarǵa toqtalǵan sportshy Nıderlandyda ótken Veık-an-Zee týrnırindegi ónerin de atap ótti. Onyń sózinshe, bul shahmat kúntizbesindegi eń bedeldi ári kúrdeli jarystardyń biri.

– Jalpy esepte besinshi oryn aldym. Týrnır jeńimpazyn uttym, bul men úshin mańyzdy nátıje boldy jáne reıtıngtik kórsetkishterimdi aıtarlyqtaı jaqsartty, – dedi ol.

Aldaǵy josparlary týraly aıta kele, shahmatshy jaqyn kúnderi Germanııaǵa attanyp, frıstaıl shahmattan kórme match ótkizetinin, sodan keıin Úmitkerler týrnırine daıyndyqty jalǵastyratynyn aıtty.

– Bul týrnır óte mańyzdy. Onda bar bolǵany segiz shahmatshy oınaıdy. Qazaqstandy mundaı deńgeıde alǵash ret tanystyratynyma qýanyshtymyn. Qatysýshylar arasynda Úndistannan úsh, Reseıden eki, Qytaıdan eki shahmatshy bar jáne men barmyn. Qazirdiń ózinde daıyndyqty bastap kettim. Árıne, maqsatym – osy týrnırdi jeńip, álem chempıony ataǵy úshin matchqa shyǵý, – dedi Asaýbaeva.

Onyń aıtýynsha, daıyndyq kúnine 8-9 saǵatqa deıin sozylady. Jumysqa 11 jattyqtyrýshy men sparrıng-seriktes tartylǵan.

Kezdesý barysynda sportshy Qazaqstan shahmat federatsııasynan marapattar men álem chempıonatyndaǵy jeńisi úshin arnaıy syıaqy aldy. Federatsııanyń atqarýshy dırektory Gúlmıra Dáýletova sportshyǵa 25 mıllıon teńge, al onyń jattyqtyrýshysyna 10 mıllıon teńge kóleminde syıaqy berilgenin aıtty.

– Bıbisara Asaýbaevanyń Úmitkerler týrnırine shyǵýy – tarıhı oqıǵa. Qazaqstan alǵash ret osy deńgeıge kóterilip otyr. Bul týrnır álem chempıony ataǵy úshin matchqa joldama beredi, – dedi Gúlmıra Dáýletova.

Ol sondaı-aq 2025 jyly Qazaqstanda birqatar iri halyqaralyq shahmat jarystary ótetinin habarlady. Atap aıtqanda, Almatyda ýnıversıtetter arasyndaǵy álem chempıonaty uıymdastyrylady. Oǵan Oksford, Garvard, Qytaı, Úndistan, Reseıdiń jetekshi joǵary oqý oryndary men Qazaqstannyń eki komandasy qatysady.

Sonymen qatar Almatyda 30 eldiń ókilderi qatysatyn mektep komandalary arasyndaǵy Azııa chempıonaty ótedi. Uıymdastyrýshylar júlde qorynan góri shahmatty keńinen nasıhattaýǵa basymdyq berip, qatysýshylardyń jolaqysy, turýy men tamaǵyn tolyq qamtamasyz etedi.

Budan bólek, túrkitildes elderdiń shahmat federatsııalary qaýymdastyǵy qurylǵan. Onyń quramyna Qazaqstan, Ázerbaıjan, Túrkııa, Ózbekstan jáne Túrikmenstan kirdi. Alǵashqy birlesken týrnır sáýir aıynda Túrkistanda ótedi.

Buǵan deıin Memleket basshysy Qasym-Jomart Toqaev Bıbisara Asaýbaevany II dárejeli «Barys» ordenimen marapattaǵany habarlanǵan bolatyn.