Bıbigúl Jeksenbaı otandyq BAQ aqparattarynan el azǵyndalý aldynda turǵandaı áser alady

ASTANA. QazAqparat - «Bas redaktorlar klýby» qoǵamdyq birlestiginiń prezıdenti Bıbigúl Jeksenbaı búgingi kúni elimizdiń buqaralyq aqparat quraldarynda krımınagendik aqparattardyń kóp beriletindigin synady, dep habarlaıdy QazAqparat.

«Jalpy, sýıtsıd máselesin teleekrannan kórsetýge tyıym salý, shekteý máselesin de zańdy túrde qarastyrý qajet dep oılaımyn. Bul - dert. Al dertti búkil dúnıege jar salyp, aıtýdyń qajettiligi shamaly. Ol sonaý Keńes zamanynda da bolǵan. Biraq, kóp jarııa ete bermeıtin. Qazir jasyratyn joq, kóptegen buqaralyq aqparat quraldaryn, gazetterdi, aqparat agenttikterdi, telearnalardy qarasaq  jańalyqtardyń 90 paıyzy krımınaldy. Sonyń ishinde, ásirese, zorlyq-zombylyq, pedofılııa, jemqorlyq kóp aıtylatyn boldy», - dedi ol Aqparat jáne kommýnıkatsııalar mınıstrliginiń alqa májilisinde.

Jeksenbaıdyń paıymynsha, aqparat zamanymyzǵa saı, qoǵamymyzdyń damýyna oń áser etindeı meılinshe jaǵymdy bolýy kerek.

«Bizdiń BAQ-ty qaraǵan kezde elimiz azǵyndalýdyń aldynda turǵan nemese sony bastap ketken memleket sııaqty kórinedi. Óıtkeni, krımınaldy, jaǵymsyz aqparattardy kóp beremiz», - dedi birlestik prezıdenti.