Bıbigúl Jeksenbaı «Bas redaktorlar klýbynyń» basshysy bolyp saılandy
NUR-SULTAN. QazAqparat - «Bas redaktorlar klýby» qoǵamdyq birlestiginiń prezıdenti bolyp belgili medıamenedjer Bıbigúl Jeksenbaı saılandy, dep habarlaıdy QazAqparat uıymnyń atqarýshy dırektory Ásem Eselbaevaǵa siltememen.
«Búgin «Bas redaktorlar klýby» qoǵamdyq birlestiginiń esep berý - saılaý konferentsııasynda birlestik prezıdenti men basqarma músheleriniń jańa quramy saılandy. Klýb prezıdenti retinde Qazaqstan jýrnalıstıkasy akademııasynyń akademıgi, belgili medıamenedjer Bıbigúl Jeksenbaı kandıdatýrasy biraýyzdan qoldaý tapty. Buǵan deıin bul qyzmetti atqarǵan Erlan Bekhojın prezıdenttikten uıymnyń jarǵysyna sáıkes, ókilettiliginiń merzimi aıaqtalýyna baılanysty bosatyldy» delingen habarlamada.
Sondaı-aq, habarlamada Bas redaktorlar klýbynyń músheleri birlestiktiń vıtse-prezıdentterin biraýyzdan saılaǵany aıtylady. Olardyń ishinde – «Ádilet.Rýhanı jańǵyrý» respýblıkalyq gazetiniń bas redaktory Muratbek Toqtaǵazın, «Sakhara» respýblıkalyq qoǵamdyq-saıası gazetiniń bas redaktorynyń birinshi orynbasary Kenjebolat Joldybaı, «Kazahstanskaıa pravda» respýblıkalyq gazeti» AQ basqarma tóraǵasy Vıacheslav Paşenko, «Sport»-«Sport» respýblıkalyq gazetiniń bas redaktory Dúısebaı Dúráli, belgili bloger Ǵalym Baıtuq bar.
