Bıbigúl Tólegenovamen bir dýette án salsam deımin - Dımash Qudaıbergen
ASTANA. QazAqparat - «Slavıan bazary-2015» baıqaýynyń Gran-prı júldesin utyp alǵan Dımash Qudaıbergen qazaqtyń bulbuly, tanymal ánshi Bıbigúl Tólegenovamen bir sahnada án salýdy armandaıdy.
Jýrnalısterdiń «sheteldik jáne qazaqstandyq ánshilerden kimmen án shyrqaýdy qalaısyz?» degen saýalyna Dımash: Sheteldik ánshilerden Dmıtrıı Malıkovpen án shyrqaǵym keledi», - dep jaýap berdi.
«Baıqaýda onymen kezdestim, ol óte qarapaıym kisi bolyp shyqty. Ol álemdik deńgeıdegi ánshi men pıanınoshy. «Slavıan bazary-2015» baıqaýynda Qazaqstan kósh bastap kele jatqandyǵyna ol qatty qýandy. Meniń jeńisimnen keıin, marapattalǵanymnan keıin ol maǵan kelip, «osynda dál seniń jeńiske jetkenińe qatty rızamyn» degen bolatyn. Men úshin ol úlken abyroı. Sebebi men Dmıtrıı Malıkov syndy keremet óner ıesin bala kezden syılaımyn».
«Qazaq ánshilerinen eń myqty ánshilerdiń biri meniń pedagogym Maıra Turlybekqyzy Dáýletbaq. Sosyn men Bıbigúl Tólegenova apamyzben bir dýette án salsam dep armandaımyn. Óıtkeni men baıqaýǵa attanarda ol kisi maǵan bata bergen edi jáne onyń batasy kómektesti», - dedi D.Qudaıbergen.
Aıta ketken jón, jaqynda ǵana Dımash Qudaıbergen «Vıtebsk-2015» XXIV estrada ánderin oryndaýdyń halyqaralyq baıqaýynyń Gran-prıin jeńip alǵan bolatyn.
Bolashaqta ánshi budan da bıik jarystardan júldeli oralýǵa ýáde etti.
«Baıqaýdan keıingi sezimimdi sózben aıtyp jetkizý múmkin emes. Sebebi, áli tolǵanys ústindemin. Jáne de osy sátti paıdalana otyryp, álem syılaıtyn bizdiń qazaq eliniń uly tulǵasy - Elbasymyz Nursultan Nazarbaevqa biz sııaqty jastardy qoldap, álemdik sahnalarǵa shyǵyp, óner kórsetý múmkindigine jol ashqany úshin úlken alǵysymdy bildirgim keledi. Bolashaqta qazaq eliniń tuǵyry odan da bıik deńgeıden kórinedi dep senemin. Aldaǵy ýaqytta budan da joǵary jarystarǵa qatysyp, elimniń Týyn jelbirete beremin degen úmittenemin»,- dep atap ótti ol.
