Bıbigúl Tólegenova jas talanttardyń «Shattyq» halyqaralyq festıvaline qazylyq etedi
NUR-SULTAN. QazAqparat - Elorda kúnine oraı 4-6 shilde kúnderi Nur-Sultan qalasynda «Shattyq» dástúrli halyqaralyq jas talanttar festıvali ótedi, dep habarlaıdy QazAqparat qala ákimdiginiń resmı sa ıtyna silteme jasap.
Shara aıasynda jas ónerpazdar qala ákimdiginiń aldyndaǵy alańda óz ónerlerin ortaǵa salady. Elbasynyń Jarlyǵymen 2019 jyl Jastar jyly dep jarııalandy. Osyǵan oraı festıval «Elorda - jastar qalasy» taqyrybynda ótedi.
Jas ónerpazdar birneshe janrda saıysqa túsedi. Atap aıtqanda, vokal, horeografııa, aspapta oınaý, sán teatry jáne ózindik janr. Bıylǵy is-sharaǵa Qazaqstan, Ózbekstan, Qyrǵyzstan, Tájikstan, Reseı, Ýkraına, Belarýs, Lıtva, Grýzııa, Armenııa, Bolgarııa, Portýgalııa, Italııa, Qytaı, Chehııa, Izraıl, Ispanııa, Serbııa, Túrkııa jáne taǵy basqa memleketterden delegatsııalar keledi.
Aıtýly sharanyń qazylar alqasynyń tóraıymy SSSR jáne Qazaqstannyń halyq artısi, Sotsıalıstik Eńbek eri Bıbigúl Tólegenova. Sonymen qatar, belgili mýzykanttar, kompozıtorlar, prodıýserler, artıster, túrli memleketterde iri halyqaralyq shyǵarmashylyq festıvaldaryn uıymdastyrýshylar da kishkentaı juldyzdardyń ónerin baǵalaıtyn bolady.
Konkýrsanttar jarysy 4 shilde kúni saǵat 14:30-da bastalady. Al delegatsııalardy qarsy alý jáne festıvaldiń saltanatty ashylýy saǵat 16:00-ge josparlanǵan. Odan keıingi kúnderi konkýrsanttar qazylar alqasynyń aldynda óner kórsetedi.
6 shildede saǵat 14:00 «Shattyq» festıvaliniń shymyldyǵy jabylady.
