Bıbigúl Tólegenova 90 jyldyq mereıtoıyn atap ótti
NUR-SULTAN. QazAqparat – 3 jeltoqsan kúni elordada álemdik opera prımadonnasy Bıbigúl Tólegenovanyń 90 jyldyq mereıtoıyna arnalǵan kesh ótti, dep habarlaıdy QazAqparat.
«Astana Opera» teatrynda ótken merekelik sharaǵa B.Tólegenovanyń shaqyrtýymen qazaqstandyq tanymal opera ánshileri, izbasarlary, Bıbigúl Tólegenova baıqaýynyń laýreattary qatysty.
Qazaqtyń bulbul ánshisi óziniń aýqymdy repertýarynan birqatar nómirlerdi oryndady. Atap aıtqanda, E.Brýsılovskııdiń «Qyz Jibek» operasynan Jibektiń (Gákký) arııasy, G.Týkaıdyń sózine jazylǵan tatardyń «Taftılıaý» áni, N.Lysenkonyń «Natalka-Poltavka» operasynan Natalkanyń arııasy shyrqaldy.
Jınalǵan qaýym QR halyq ártisiniń árbir óner kórsetýinen keıin tik turyp, qoshemet kórsetti.
«Búgin Tuńǵysh Prezıdentimiz-Elbasy Nursultan Ábishuly Nazarbaevtyń bastamasymen salynǵan «Astana Opera» teatrynda áıgili ánshi, ańyz adam Bıbigúl Ahmetqyzy Tólegenovanyń mereıtoıyna oraı keremet kesh ótýde. Sizdi shyǵarmashylyq keshińizben shyn júrekten quttyqtaımyn. Jyl boıy, álemniń ár buryshynan sizdiń atyńyzǵa myńdaǵan hat kelip túsýde. Bıbigúl Ahmetqyzy, sizge QR Prezıdenti Qasym-Jomart Kemeluly Toqaevtyń quttyqtaýyn oqyp berýge ruqsat etińiz, - degen QR Mádenıet jáne sport mınıstri Aqtoty Raıymqulova Memleket basshysynyń jáne QR Parlamenti Senatynyń tóraǵasy Darıǵa Nazarbaevanyń quttyqtaý hattarynan jyly lebizderdi oqyp berdi.
Kesh barysynda opera janrynyń has sheberleri – Dına Hamzına, Jannat Baqtaı, Medet Chotabaev, Italııadan arnaıy kelgen Kozımo Oreste, sondaı-aq daryndy jas ártister – Nazym Saǵyntaı, Gúljanat Sapaqova, Meıir Baınesh, Gúldana Aldadosova jáne taǵy basqalary ónerlerin pash etti.
«Astana Opera» sımfonııalyq orkestrine Abzal Muhıtdın men Arman Orazǵalıev jetekshilik etti. Teatrdyń balet trýppasy da Bıbigúl Tólegenovany jalyn atqan nómirlerimen quttyqtady. Tanymal ártister Gaýhar Ýsına, Taıyr Ǵataýov, Oljas Tarlanov, Ánel Rústemova, Nazıra Zaetova, Bostan Qojabekov, Danııar Jumataev horeografııalyq ónerdiń jaýharlaryn usyndy. Balet trýppasynyń kórkemdik jetekshisi – Altynaı Asylmuratova. «Astana Opera» teatrynyń hory bas hormeıster Erjan Dáýitovtiń jetekshiligimen keremet óner kórsetti. Kontserttiń rejısseri – Natalıa Kagadıı.
«Sizderge zor densaýlyq, baq-bereke, molshylyq tileımin, qýanyshty kúnderimiz kóp bolsyn, Qudaı Taǵala bizge qaıǵy kórsetpesin, elimizde beıbitshilik bolsyn, barlyǵymyz aman bolaıyq. Men kóp qıynshylyqty, sonyń ishinde Uly Otan soǵysyn da, ashtyq pen kedeılikti de kórdim. Sondyqtan bizdiń qazirgi ómir súrip jatqan ýaqytymyz – jumaq deýge bolady. Búgingi keshime kóp adam jınaldy – bul úlken baqyt, munyń bári bizdiń Tuńǵysh Prezıdentimiz N.Nazarbaevtyń arqasy. Ol halyq úshin kóp jaqsylyq jasady. Bul týraly umytpaýymyz qajet», - dedi Bıbigúl Tólegenova.
Bıbigúl Tólegenova HH ǵasyrdaǵy eń ataqty jıyrma áıeldiń biri retinde ıÝNESKO tizimine engen. Ol jıyrmadan astam marapatqa ıe. Ánshiniń san qyrly repertýary «Gayhap tas», «Jıyrma bes» sııaqty halyq ánderinen, L.Hamıdıdiń «Bulbul», E.Brýsılovskııdiń «Qos qarlyǵash», M.Tólebaevtyń «Eske alý», E.Rahmadıevtyń «Tarantella», S.Muhamedjanovtyń «Kóktem valsi» syndy qazaqstandyq kompozıtorlardyń týyndylarynan, sondaı-aq P.I.Chaıkovskıı, S.V.Rahmanınovtyń romanstarynan, N.Rımskıı-Korsakovtyń operalaryndaǵy arııalardan, batys kompozıtorlarynyń (G.Donıtsettı, E.Grıg, F.Shýbert) shyǵarmalarynan jáne t.b. quralǵan.
