Bıbigúl Jeksenbaı: Qumar oıyndar — qoǵamnyń derti
ASTANA. KAZINFORM – Memleket basshysy «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspektsııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń Zańyna qol qoıǵany belgili. Senat depýtaty Bıbigúl Jeksenbaı áleýmettik jelige zań týraly pikirin jazdy.
«Qumar oıyndary qazaqstandyq qoǵamnyń dertine aınaldy. Medıtsınada lýdomanııa patologııalyq ózgeris retinde anyqtalyp, em taǵaıyndalatyn boldy. Dúnıejúzilik densaýlyq saqtaý uıymy lýdomanııany májbúrli emdeýdi qajet etetin dert sanatyna qosqan», — dep jazady depýtat.
Depýtattyń sózinshe, Qazaqstanda bul derttiń quryǵyna túskender sany 400 myńǵa jetipti. Sondaı-aq, árbir besinshi qazaqstandyqtyń qumar oıynyna qatysty bary anyqtalyp otyr. Al, quqyq qorǵaý organdarynyń málimetinshe, shamamen 200 myńǵa jýyq jasóspirim basqa adamnyń atynan býkmekerlik keńselerge bás tigip, oınaıdy eken.
«Sarapshylarǵa sensek, sońǵy eki-úsh jylda elimizde býkmekerlik keńseler men kazınolar sany segiz ese ósipti. Al olardan túsetin qarjy aınalymy — jarty trıllıon teńgege jaqyndaǵan.Ulttyq Quryltaı alańynda bul másele qaralyp, Memleket basshysy zańnamalyq turǵydan Parlamentke sessııa sońyna deıin sheshý qajettigin tapsyrǵan bolatyn. Prezıdent qumar oıynǵa táýeldi azamattardyń qatysy bar qylmystar kóbeıgenine quqyq qorǵaý organdarynyń nazaryn aýdaryp, aldyn alý jumystaryn júrgizip, zańdylyq pen quqyqtyq tártipti qamtamasyz etý úshin sharalar qabyldaý jóninde tapsyrma berdi. Memleket basshysy Q. Toqaev elimizde lýdomanııanyń beleń alýyna qarsy baǵyttalǵan áleýmettik daǵdylardy qalyptastyrýda qoǵamnyń, din qyzmetkerleriniń jáne buqaralyq aqparat quraldarynyń atqaratyn róli erekshe ekenin atap ótken», — deıdi Bıbigúl Jeksenbaı.
Senat depýtatynyń aıtýynsha, Parlament depýtattary men sarapshylardyń belsene qatysýymen qumar oıyndaryn shekteýge qatysty zań sessııa sońyna qaraı qabyldanǵan.
«Al, búgin Aqorda saıty habarlaǵandaı, Qazaqstan Prezıdenti qujatqa qol qoıyldy. „Zań arqyly halyqtyń oıynǵa táýeldiligin tómendetýge baǵyttalǵan shekteýshi jáne yntalandyrýshy normalar engiziledi. Atap aıtqanda, qumar oıyndarǵa/bás tigýge qatysýyna tyıym salynatyn adamdar sanatynyń tizimi keńeıtildi. Endi olardyń qataryna Boryshkerlerdiń biryńǵaı tiziliminde turǵan tulǵalar (atqarýshylyq is júrgizý boıynsha boryshkerler týraly málimetterdi qamtıtyn elektrondyq derekter banki) qosyldy. Sonymen qatar sybaılas jemqorlyqqa qarsy shekteý engizý arqyly jaýapty memlekettik laýazymdy atqaratyn, memlekettik fýnktsııalardy oryndaýǵa ýákilettik berilgen adamdardyń, olarǵa teńestirilgen adamdardyń qumar oıyndarǵa/bás tigýge qatysýyna shekteý qoıylady. Budan bylaı memlekettik qyzmetshiler, áskerı qyzmetshiler, arnaıy jáne quqyq qorǵaý organdarynyń qyzmetkerleri, bıýdjettik uıymdardyń basshylary qumar oıyndarǵa/bás tigýge qatysa almaıdy. Bul shekteýdi saqtamaǵany úshin olardy jumystan shyǵarý sharasy qarastyrylǵan. Oıyn bıznesin uıymdastyrýshylardyń qyzmetin retteý tetikteri kúsheıtildi. Týrızm jáne sport mınıstrligi oıyn mekemesiniń, býkmekerlik keńseniń, totalızatordyń, stavkalardy qabyldaý jáne qumar oıyndardyń/bás tigýdiń biryńǵaı erejelerin bekitedi», — delingen jazbasynda.
Bıbigúl Jeksenbaıdyń aıtýynsha, endi býkmekerlik keńseler men totalızatorlardyń jarnamalaryna shekteý qoıyldy.
«Atap aıtqanda, býkmekerlik keńseler men totalızatorlardy syrtqy (kórneki) jarnamasyna, sondaı-aq olardyń qyzmetin kólik quraldarynda, buqaralyq aqparat quraldarynda, kıno -, vıdeo-jáne anyqtamalyq qyzmet kórsetý oryndarynda jarnamalaýǵa tyıym salynady. Tek býkmekerlik keńse nemese totalızator ornalasqan jerdegi syrtqy jarnamaǵa; sport ǵımarattarynyń ishinde jáne sportshylardyń kıiminde; sporttyq taqyrypqa mamandanǵan jáne resmı tirkelgen BAQ-ta, sondaı-aq otandyq telearnalar halyqaralyq sporttyq jarystardy tikeleı translıatsııa jasaǵan kezde jarnamalaýǵa ruqsat etiledi.Sonymen qatar lotereıa qyzmetin retteý tetikteri jańartyldy. Naqtyraq aıtqanda, turǵyn úılerde, jataqhanalarda, ǵıbadat úılerinde, mádenıet uıymdarynyń ǵımarattary men qurylystarynda, áleýmettik obektilerde (bilim berý, densaýlyq saqtaý), sondaı-aq olardan júz metr qashyqtyqtaǵy radıýsta lotereıa bıletterin taratýǵa jáne lotereıa termınaldaryn ornatýǵa tyıym salynady. Óskeleń urpaqtyń densaýlyǵyn energetıkalyq sýsyndardyń zııandy saldarynan qorǵaý úshin mundaı sýsyndardy 21 jasqa deıingi adamdarǵa satýǵa tyıym salynady», — deıdi Senat depýtaty Bıbigúl Jeksenbaı.
