Bıbigúl Jeksenbaı: Konstıtýtsııa preambýlasy – Qazaqstannyń beıbit ustanymynyń aınasy

ASTANA. KAZINFORM – Kez kelgen memlekettiń ókili Qazaqstan Respýblıkasynyń Konstıtýtsııasyn tanyp-bilý úshin eń aldymen preambýlany qaraıdy. Óıtkeni memleketimizdiń negizgi baǵyty men qundylyqtary sol bólimde kórinis tabady. Bul týraly Senator Bıbigúl Jeksenbaı «Referendým-2026» onlaın marafonynda aıtty.

– Konstıtýtsııanyń preambýlasyn qaraǵan kezde, elimizdiń negizgi baǵytyn, onyń ishinde beıbit ómirge jáne beıbitshilikke degen ustanymyn túsinýge bolady. Burynǵy Konstıtýtsııada bul baǵyttar aıtylǵanymen, jańa jobada naqtylanyp kórsetilýi erekshe mán beredi, - dedi depýtat.

Bıbigúl Jeksenbaı tarıhı mıssııaǵa da toqtaldy.

– Qazaqstannyń tarıhynda eshqashan basqynshylyqqa umtylǵan memleket bolmaǵan. Preambýlada bul mıssııa naqtylap kórsetilgen. Qazaqstan árqashan beıbit jolmen, dıalog arqyly adamdarmen jáne kórshi memlekettermen qarym-qatynas jasap, beıbitshilikti baǵalaıtyn memleket bolyp keledi. Bul – bizdiń tarıhı dástúrimiz ben halyqaralyq saıasattaǵy baǵytymyzdyń aıqyn kórinisi, - dedi ol.

Depýtat Qazaqstannyń beıbitshilikti is júzinde júzege asyrǵanyn atap ótti.

– Mysaly, ıadrolyq qarýdan bas tartý – Qazaqstannyń alǵashqy mańyzdy qadamy boldy, bul baǵytta elimiz álemdegi alǵashqy memleketterdiń qatarynda. Sonymen qatar Sırııadaǵy jaǵdaı boıynsha memleketterdi tatýlastyrý jáne beıbit dıalogty ornatý sııaqty qadamdar da Qazaqstannyń halyqaralyq arenadaǵy beıbit ustanymyn dáleldeıdi. Sondyqtan Konstıtýtsııadaǵy basty jetistik – preambýlanyń beıbit ómirge degen ustanymnan bastalýy. Bul bizdiń halyqaralyq arenadaǵy beıbit saıasatyn naqty kórsetetin mańyzdy qadam, - dedi Bıbigúl Jeksenbaı.

Aıta keteıik, Kazinform agenttiginiń YouTube arnasynda «Referendým-2026» onlaın-marafony tikeleı efırde kórsetilip jatyr.