Bıbigúl Tólegenova Quryltaı saılaýynda óz úıinde daýys berdi

№ 559 saılaý ýchaskesiniń ókilderi Bıbigúl Tólegenovanyń úıine kelip, turǵylyqty jeri boıynsha óz tańdaýyn jasaýǵa múmkindik berdi. Halyq ártisi daýys bergen soń aq batasyn berip, Quryltaı saılaýynyń ótýin qoldaıtynyn bildirdi.

— Bul — Quryltaıǵa ótip jatqan alǵashqy saılaý. Muny óte durys qadam dep oılaımyn. Ár memlekettiń óz ulttyq múddesi bar, sondyqtan bizdiń de óz Quryltaıymyz bolýy tıis. Sol sebepti bul saılaýdy qoldaımyn. Óz tańdaýymdy jasadym. Árıne, Prezıdentimizdi, onyń bastamalary men el úshin jasap jatqan barlyq ıgi isterin qoldaımyn. Biz durys baǵytta kele jatyrmyz dep oılaımyn, — dedi Bıbigúl Tólegenova.

Sonymen qatar ol ósip kele jatqan urpaqty qoldaýǵa baǵyttalǵan sharalardyń mańyzdylyǵyn atap ótti.

Bıbigúl Tólegenova aǵa býynǵa da kóbirek kóńil bólýge shaqyryp, qarttardyń da el damýy men keleshek urpaqtyń bolashaǵyna óz úlesin qosqanyn aıtty. Sóziniń sońynda Qazaqstanǵa beıbitshilik pen amandyq tiledi.

— Eń bastysy — tóbemizde árdaıym ashyq aspan bolyp, tatý-tátti ári kópultty memleketimizde beıbit ómir súrip, eńbek etýimizge eshteńe kedergi bolmasa eken deımin, — dedi ol.

Eske salaıyq, elimiz boıynsha 10 363 saılaý ýchaskesinde daýys berý júrip jatyr. Saılaýshylar tizimine 12 605 788 adam engizilgen.

Quryltaı saılaýynyń hronıkasyn osy siltemeden oqı alasyzdar.