Bıbarys Jeksen álem chempıonatynda ózbekstandyq Olımpıada chempıonynan jeńildi

ASTANA. KAZINFORM - Anglııanyń Lıverpýl qalasynda World Boxing aıasynda ótip jatqan álem chempıonatynda Qazaqstan quramasynan Bıbarys Jeksen (65 keli) shırek fınaldan asa alǵan joq.

Otandasymyz shırek fınalda ózbekstandyq Abdýmalık Halokovpen sheberlik baıqasty.

Abdýmalık Halokov 2024 jyly Parıj Olımpıadasynda chempıon atansa, álem chempıonatynda bir márte altyn, bir márte kúmis aldy.

Jekpe-jek barysynda otandasymyz qarsylasyna kóbirek soqqy jumsaýǵa tyrysty. Degenmen ol qarsylasyna jol berip, álemdik dodadan shyǵyp qaldy.

Búgin el quramasynan Alýa Balqybekova (51 keli), Mahmýd Sabyrhan (55 keli), Tórehan Sabyrhan (70 keli), Aıda Ábikeeva (65 keli), Vıktorııa Grafeeva (60 keli), Eldana Talıpova (80 keliden joǵary) jartylaı fınalǵa shyqsa, Nurbek Oralbaı (80 keli), Saǵyndyq Toǵambaı (90 keli), Karına Ibragımova (57 keli) jarys jolyn aıaqtady.

Endi el quramasynan Ertýǵan Zeınýlınov (65 keli), Aıbek Oralbaı (90 keliden joǵary) sharshy alańǵa shyǵady.

Dúbirli doda 4-14 qyrkúıek aralyǵynda Anglııanyń Lıverpýl qalasynda ótedi. Jekpe-jekter «Qazaqstan» jáne «Qazsport» telearnalarynan tikeleı efırde kórsetiledi.

Álemniń ár qıyrynan kelgen boksshylar 4-10 qyrkúıek aralyǵynda irikteý kezeńinde saıysqa túsedi. Al 12-13 qyrkúıekte jartylaı bolsa, 13-14 qyrkúıekte fınaldyq básekeler ótedi.