Bıatlonnan Qazaqstan quramasy dopıng qoldandy dep kúdiktelýde
ASTANA. QazAqparat - Hohfıltsende avstrııalyq polıtsııa bıatlonnan Qazaqstan quramasy turyp jatqan jerdi tintip, kóptegen medıtsınalyq qurylǵylar men tyıym salynǵan farmakologııalyq dári-dármekter tapty.
Tabylǵan zattar tárkilenip, derek boıynsha tergeý jumystary bastaldy, dep habarlaıdy QazAqparat Sports.kz saıtyna silteme jasap.
Tabylǵan dárilik zattar men quraldar Avstrııanyń ulttyq dopıngke qarsy agenttigine (NADA Avstrııa) tapsyryldy. Qujattar men qolmen jazylǵan qaǵazdarǵa júrgizilgen saraptama negizinde, qoraptar men ondaǵy zattardyń bıatlonnan Qazaqstannyń ulttyq quramasyna tıesili ekendigin topshylaýǵa bolady.
Qazaqstan bıatlon federatsııasynyń bas hatshysy Manas Úsenovtiń aıtýynsha, Avstrııanyń federaldy polıtsııasy osy elde tabylǵan dári-dármekterdiń Qazaqstannyń bıatlon quramasyna tıesili ekendigi tekserilip jatqandyǵyn habarlaǵan. Qazirgi tańda olardyń tyıym salynǵan dáriler ekendigin aıtý ázirge erte.
«Avstrııa federaldyq polıtsııasy baspasóz máslıhatynda málimdegendeı, Antholts mańynda medıtsınalyq dári-dármekterdiń qaldyqtary bar qoraptar tabylǵan. Dál sol jerden Qazaqstan quramasy dárigeriniń akkredıtatsııasy tabyldy. Keshe qonaq úıde bizdiń komandany tintidi. Dárigerdiń medıtsınalyq dári-dármekteri tárkilendi. Biraq, bizde barlyq dári-dármekterdiń ruqsaty bar. Sondaı-aq, polıtsııa qazirgi tańda tabylǵan zattardyń tekserilip jatqandyǵyn málimdedi. Olardyń tyıym salynǵandyǵy nemese joqtyǵyn, saraptama kórsetedi. Bizdiń komanda dopıng jáne DNK testin tapsyrdy. Endi saraptama nátıjesin kútýdemiz. Avstrııanyń dopıng agenttigi qoraptarda tabylǵan dári-dármekterdiń saraptamasyn aldy. Qazirgi tańda nátıjesi týraly aqparatty kútemiz», - dedi QR Bıatlon federatsııasynyń bas hatshysy.
