Bıatlonnan álem kýbogy: Vladıslav Kıreev iz kesý jarysynda TOP-20-ǵa kirdi

ASTANA. KAZINFORM – Aýstrııanyń Hohfıltsen qalasynda álem kýbogy kezeńinde 12,5 shaqyrym qashyqtyqta iz kesý jarysy aıaqtaldy.

Bul dodada Qazaqstannan Vladıslav Kıreev pen Áset Dúısenov baq synady. Іz kesý saıysyna V.Kıreev 33-inshi, al Á.Dúısenov 53-inshi bolyp shyqty.

Tórt atý aılaǵynda birde-bir nysanasyn múlt jibermegen Vladıslav Kıreev birden 20-orynǵa kóterilip, sporttyq jolynda úzdik nátıjesine qol jetkizdi.

Vladıslav osy dodada 60 sportshynyń ishinen mergendik tanytqan úsh bıatlonshynyń biri boldy. Onymen birge jarys jeńimpazy, frantsııalyq Erık Perro men 14-orynnan kóringen lıtvalyq Vıtaýtas Strolıa birde-bir oǵyn qur jibermedi. 

Áset Dúısenov te jaqsy kele jatqan. Ol tek sońǵy atý aılaǵynda eki ret múlt ketti. Soǵan qaramastan, Áset te kórsetkishin jaqsartyp, 16 satyǵa joǵarylyp, máre syzyǵyn 37-inshi bolyp qıdy. 

Іz kesý jarysynda E.Perroǵa jol bergen ıtalııalyq Tommazo Djakomel kúmis, norvegııalyq Iohan-Olav Botn qolany qanaǵat tutty. 

Álem kýbogynda jekeleı synda jalpy esepte V.Kıreev 35 upaımen 37-orynda tur. Sondaı-aq alǵashqy 4 upaıyn alǵan Á.Dúısenov 65-satyǵa shyqty. 

Eske sala keteıik, budan buryn qazaqstandyq bıatlonshynyń álem kýbogy kezeńinde ekinshi ret iz kesý jarysyna joldama alǵanyn jazǵan edik.