Bıatlonnan ÁCh: Qazaqstan áıelder quramasy úzdik jıyrmalyqqa ilikti
NUR-SULTAN. QazAqparat – Poklıýkada (Slovenııa) bıatlonnan ótip jatqan álem chempıonatynda Qazaqstan áıelder quramasy úzdik jıyrmalyqqa ilikti, dep habarlaıdy QazAqparat tilshisi.
Estafetalyq jarysty sátti ótkizgen Norvegııa quramasy jeńimpaz atandy. Norvegııalyq tórttik ótken jyly da úzdik shyqqan bolatyn. Bul – asa myqty Norvegııa quramasynyń osy álem birinshiligindegi besinshi altyn medali.
Germanııalyq Frantsıska Proıs márege sanaýly metr qalǵanda, Ýkraına quramasynyń kapıtany Elena Pıdgrýshnaıany basyp ozyp, óz komandasyna kúmis júldeni syılady. Ýkraınalyqtar úzdik úshtikti túıindedi.
Belarýs quramasynan bastapqyda Irına Krıvko, Dınara Álimbekova, Anna Sola sátti óner kórsetkenimen, sońǵy bolyp jarys jolyna shyqqan Elena Krýchınkına kesheýildep, tórtinshi orynda qalyp qoıdy.
Qazaqstan namysyn qorǵaǵan Galına Vıshnevskaıa-Sheporenko, Lıýdmıla Ahatova, Elızaveta Belchenko jáne Anastasııa Kondrateva qorytyndyda 20-orynnan kórindi.
Búgin sondaı-aq estafetadan erler quramalary da synǵa túsedi.
