Bıatlon: Vıshnevskaıa úzdik ondyqqa ilikti
ASTANA. QazAqparat - Shvetsııanyń Estersýnd qalasynda álem kýbogy kezeńinde áıelder búgin 10 km qashyqtyqta izge túsip jarysýdan synǵa tústi, dep habarlaıdy QazAqparat tilshisi.
«Eýrosport» telearnasynan tikeleı efırde kórsetkenindeı, osynyń aldynda sprıntten jeńimpaz atanǵan germanııalyq Denıze Herrman jarys jolyna birinshi bolyp shyqty. Ol nysana kózdeýden eki márte múlt ketkenimen, bul joly da eshkimge des bergen joq. Frantsııalyq Jıýstın Breza sońǵy nysana kózdeýden keıin D.Herrmanmen birge shyqqanymen, oǵan ilese almaı, bul joly da kúmis júldeni qanaǵat tutty. Norvegııalyq Marte Olsbý úzdik úshtikti túıindedi.
Jarys jolyna 13-inshi bolyp shyqqan Galına Vıshnevskaıa tek sońǵy nysana kózdeýde ǵana bir ret múlt ketip, márege onynshy bolyp jetti. Sóıtip ol bıylǵy álem kýbogy jarystarynda óziniń babynda ekendigin dáleldep keledi. Árıne, basty maqsat aldaǵy jyly Ońtústik Koreıanyń Phenchhan qalasynda ótetin qysqy olımpıada oıyndarynda barynsha sátti óner kórsetý ekeni anyq.
Eske sala keteıik, G.Vıshnevskaıa Maksım Braýnmen birge bıylǵy betashar synda aralas estafetadan Qazaqstan bıatlony tarıhynda tuńǵysh ret álem kýbogy kezeńinde qola júldege qol jetkizgen bolatyn. Sodan keıin 15 shaqyrymdyq jekeleı synda 20-synshy, 7,5 shaqyrymdyq sprıntte 13-inshi oryndy ıelengen edi.
