Bıatlon: qazaqstandyq G.Vıshnevskaıa álem kýbogy kezeńinde 15-orynda
ASTANA. QazAqparat - Germanııanyń Rýpoldıng qalasynda bıatlonnan álem kýbogy kezeńinde 15 km qashyqtyqta qazaqstandyq Galına Vıshnevskaıa 15-inshi oryndy ıelendi.
«Eýrosport» telearnasynan tikeleı efırde kórsetkenindeı, bul jarysta nysana kózdeýde birde-bir márte múlt ketpegen ıtalıandyq Doroteıa Vırer jeńimpaz atandy. Nysana kózdeýde bir retten qapy ketken fınlıandııalyq Kaısa Mıakıarıaınen men chehııalyq Gabrıela Soýkalova sáıkesinshe ekinshi-úshinshi oryndardy bólisti.
Galına Vıshnevskaıa jarys qorytyndysynda nysana kózdeýde birde-bir ret múlt jibermeı, mergendik tanytqan azdaǵan bıatlonshynyń biri boldy. Bul oǵan shańǵymen júgirýde ushqyrlyq tanytpaǵanmen, óz sporttyq ǵumyrynda eresekter arasynda tuńǵysh ret úzdik 15 bıatlonshynyń qataryna enip, joǵary nátıje kórsetýine múmkindik berdi. Sóıtip kóptegen ataqty sportshylardyń ózin artta qaldyrdy.
Basqa qazaqstandyqtar Anna Kıstanova 42-inshi, Alına Raıkova 61-inshi orynnan kórindi.
Aıta keteıik, G.Vıshnevskaıa - mamandardyń nazaryn aýdaryp úlgergen, bolashaǵynan úlken úmit kúttiretin jas bıatlonshynyń biri. Aldaǵy aqpan aıynda nebári 22 jasqa tolatyn Galına budan buryn 2012 jyly qysqy jastar olımpıadalyq oıyndarynyń kúmis jáne qola júldegeri atanýmen birge sol jyly jastar arasyndaǵy álem chempıonatynda ekinshi oryndy ıelengen bolatyn. Endi, mine, eresekter arasyndaǵy básekede de kózge túse bastady.
