Bıatlon: Qazaqstan áıelder quramasy álem chempıonatynda 8-inshi orynǵa kóterildi
ASTANA. QazAqparat - Norvegııanyń Holmenkollen qalasynda bıatlonnan ótip jatqan álem chempıonatynda áıelder arasynda estafetalyq jarys márege jetti.
«Eýrosport» telearnasynan tikeleı kórsetkenindeı, álemniń 23 quramasy qatysqan básekede qazaqstandyqtar segizinshi orynǵa kóterilip, úzdik ondyqtyń qataryna ilikti. Ásirese, birinshi jáne ekinshi kezeńde Galına Vıshnevskaıa men Darıa Ýsanov márege besinshi bolyp kelse, odan keıin Anna Kıstanova Qazaqstan quramasyn tipti tórtinshi orynǵa shyǵardy. Bul rette G.Vıshnevskaıa nysana kózdeýde birde-bir ret qatelespese, D.Ýsanova qosymsha bir, A.Kıstanova eki oqty paıdalandy. Sońǵy kezeńge ár qurama kóbine óz myqtylaryn qoıatyny belgili. Sol sebepti ári nysana kózdeýde tórt ret múlt ketkendikten, Alına Raıkova márege segizinshi bolyp keldi.
Eń bastysy, bul jarys qazaqstandyqtardyń da álemniń kúshti quramalarymen básekege túse alatyndyǵyn kórsetti.
Estafetalyq synda Norvegııa quramasy jeńimpaz atansa, Frantsııa ekinshi, Germanııa úshinshi oryndy ıelendi.
